د. عەلا سوبحی، پزیشکی پسپۆڕی نەخۆشییەکانی دڵ، چەند ڕێنوێنییەک بۆ خۆپاراستن لە تووشنەبوون بە ئاڵۆزییەکانی ئەنجامدانی نەشتەرگەریی دڵ  بۆ هاونیشتمانییان دەخاتەڕوو.

ڕێنوێنییەکانی پێش ئەنجامدانی نەشتەرگەریی دڵ

پزیشکە پسپۆڕەکە دەڵێت " پێش ئەنجامدانی نەشتەرگەریی دڵ ئەم هەنگاوانە جێبەجێ بکرێن"، لەوانە:

1. ڕاستگۆیانە هەموو زانیارییە پزیشکییەکان بە پزیشکەکە بوترێت وەک: بوونی  نەخۆشییەکانی دیکە، هەستیاربوون بە جۆری دەرمانەکان
2. ئەگەر  چارەخوازەکە جگەرەکێش بێت، دەبێت چەند هەفتەیەک پێش نەشتەرگەرییەکە واز لە جگەرەکێشان بهێنێت، چونکە جگەرەکێشان مەترسیی تووشبوون بە کێشە تەندروستییەکانی دڵ و سییەکان زیاد دەکات
3. دەبێت شەکرەی خوێن، فشاری خوێن، و ئاستی چەوریی خوێنی چارەخوازەکە بە باشی کۆنترۆڵ بکرێت
4. ڕێنماییەکانی پزیشکەکە سەبارەت بە وەستاندن یان گۆڕینی هەندێک دەرمان
5. خۆراکی تەندروست بخورێت و  چارەخوازەکە لەژێر چاودێریی پزیشکی پسپۆڕدا هەوڵبدات بەپێی توانای جەستەیی خۆی چالاکییەکی جەستەیی هەبێت

ڕێنوێنییەکانی پاش ئەنجامدانی نەشتەرگەریی دڵ

پزیشکەکە دەڵێت " پاش ئەنجامدانی نەشتەرگەریی دڵ ئەم هەنگاوانە جێبەجێ بکرێن"، لەوانە:

1. نابێت چارەخوازەکە بۆماوەی  شەش بۆ هەشت هەفتە، هیچ جۆرە قورساییەک هەڵبگرێت
2. پێویستە چارەخوازەکە دووربکەوێتەوە لە ڕاکێشان یان پاڵنانی شتومەکی قورس
3. بە شێوەیەکی گشتی بۆ ماوەی چوار  بۆ شەش هەفتە نابێت چارەخوازەکە شۆفێری بکات
4. نابێت چارەخواز لە حەوزی ئاو (بانیۆ)، مەلەوانگە، یان جاکوزیدا دابنیشێت تاوەکو ئەو کاتەی پزیشکە پسپۆڕەکەی دڵنیا دەبێتەوە کە برینی چارەخوازەکە بە تەواوی وشک بووەتەوە و داخراوە
5. لە کاتی خۆشتندا نابێت لیفکە یان سابوون بە توندی لە شوێنی نەشتەرگەرییەکە بدرێت
6. لە چەند هەفتەی یەکەمدا پێویستە چارەخواز تەنیا  لەسەر پشت بخەوێت بۆ ئەوەی ئێسکی سنگ جێگیر بێت و نەکشێت
7. پاک و خاوێن ڕاگرتنی برینەکە