د. هێمن مەحموود، پزیشکی پسپۆڕی نەشتەرگەریی گشتی، چەند زانیارییەک لەسەر گەورەبوونی لیمفەگرێکانی سەر و مل دەخاتەڕوو.

لیمفەگرێکان چین؟

پزیشکە پسپۆڕەکە دەڵێت " دەکرێت لیمفەگرێکان لە هەر شوێنێکی جەستەدا هەبن، لیمفەگرێکان بەشێکن لە سیستمی بەرگریی جەستە، بۆیە کاتێک جەستە تووشی هەوکردن  یان هەر نەخۆشییەک دەبێت دەکرێت ئەم لیمفگرێیانە بەتایبەتی لیمفەگرێکانی سەر و مل گەورە ببن".

هۆکارەکانی گەورەبوونی لیمفەگرێکان چین؟

پزیشکەکە دەڵێت " باوترین هۆکارەکانی گەورەبوونی لیمفەگرێکانی سەر و مل هۆکاری هەوکردنە"، وەک:

1. تووشبوون بە پەتا یان هەر نەخۆشی و هەوکردنێکی سەر و مل
2. هەوکردنی کۆئەندامی هەناسە وەک لەوزەتێن و گیرفانەکانی لووت
3. هەوکردنی گوێ
4. هەوکردنی پوکی ددان
5. بوونی کێشە لە سییەکاندا
6. لەهەندێک حاڵەتدا دەکرێت گەورەبوونی لیمفەگرێکان شێرپەنجەیی بێت وەک لیمفۆما و شێرپەنجەی خوێن یان کاتێک ئەندامێکی نزیکی لیمفەگرێکان تووشی شێرپەنجە ببێت، لەوەیە خانە شێرپەنجەییەکان لیمفەگرێکانیش بگرێتەوە، بۆیە نابێت هیچ کات گەورەبوونی لیمفەگرێکان پشتگوێ  بخرێت

لە چ کاتێکدا  گەورەبوونی لیمفەگرێکانی سەر و مل مەترسیدارە و نابێت پشتگوێ  بخرێت؟

کاتێک ​کەسێک ئەم نیشانانەی هەبوو پێویستە بەزووترین کات سەردانی پزیشکی پسپۆڕ بکات:

1. کاتێک گەورەبوونی لیمفەگرێکان زیاد لە دوو هەفتە بەردەوام بوو
2. کاتێک گەورەبوونی لیمفەگرێکان لەرز،  تا و ئارەقکردنەوەی شەوانی لەگەڵدا بوو
3. کاتێک کەسەکە ئارەزووی خواردنی نەبێت و  هەست بە ماندوویەتیی زۆر بکات
4. کاتێک کەسەکە هەست بکات لەناکاو کێشی جەستەی دابەزیوە