ئەمیندارى کۆمکارى عەرەبى ڕەخنە لە سیاسەتەکانى ئێران دەگرێت و هێرشەکانى ئەم دواییەى سەر هەرێمى کوردستان و وڵاتانى عەرەبى بە پێشێلکارى ئاشکراى سەروەرى و یاسا نێودەوڵەتییەکان ناو دەبات.

سەرکۆنەکردنى هێرشەکان بۆ سەر هەرێم و وڵاتانى عەرەبى

کۆمکارى عەرەبى بە فەرمى سەرکۆنەى ئەو هێرشانەى کرد کە دەکرێنە سەر هەرێمى کوردستان و وڵاتانى عەرەبى. نەبیل فەهمى، ئەمیندارى کۆمکارى عەرەبى ڕایگەیاند، هێرشەکانى ئێران بۆ سەر وڵاتانى کەنداو و هەرێمى کوردستان هەوڵێکى ئاشکرایە بۆ فراوانکردنى ڕووبەرى ململانێکان و بردنى ناوچەکە بەرەو پشێوى و تێکدانى ئاسایش و سەقامگیرى.

کردنە ئامانجى ژێرخانى ئابوورى و سیاسەتى دوژمنکارانە

ئەمیندارى کۆمکارى عەرەبى ئاماژەى بەوە کردووە، هەڵکشانى هێرشە ئاشکرا و دوژمنکارییەکانى ئێران بۆ سەر (بەحرەین، ئوردن، قەتەڕ، کوەیت و هەرێمى کوردستان) و کردنە ئامانجى ژێرخانى ئابوورى، ڕەنگدانەوەى سیاسەتێکى دوژمنکارانەیە. جەختى لەوەش کردەوە کە ناکرێت لە بەرامبەر ئەم سیاسەتانەدا بێدەنگ بن و قبوڵى بکەن.

پێشێلکردنى سەروەرى و یاسا نێودەوڵەتییەکان

نەبیل فەهمى ڕایگەیاند، ئەم هێرشانە ئاماژەن بۆ ڕژدبوونى ئێران لەسەر گرتنەبەرى سیاسەتێک کە لەسەر حساباتى هەڵە و خوێندنەوەى پێچەوانەى واقیع بونیادنراوە. هەروەها ئەم هەنگاوانەى بە پێشێلکردنى ئاشکراى سەروەرى و وڵاتان، یاسا و پەیماننامە نێودەوڵەتییەکان و بنەماکانى دراوسێیەتى باش وەسف کرد.

داواکارى بۆ ڕاگرتنى هێرشەکان و گەڕانەوە بۆ دانوستان

کۆمکارى عەرەبى داوا لە ئێران دەکات ئاڵۆزییەکان کەمبکاتەوە و دەستبەجێ هێرشەکان ڕابگرێت. هاوکات داواى لێدەکات واز لە بڵاوکردنەوەى پشێوى و هەڕەشەکردن لە ئاسایشى دەریاوانى بهێنێت و بگەڕێتەوە بۆ سەر ڕێڕەوى دانوستان و پابەندبوون بە یاسا نێودەوڵەتییەکان.