ئەرجەنتین ئەمشەو لە یاریی کۆتایی مۆندیالی 2026 ڕووبەڕووی ئیسپانیا دەبێتەوە، لەکاتێکدا سەرۆکی وڵاتەکە بەهۆی بیروباوەڕی "بەختی خراپ"ەوە بڕیاریداوە نەچێتە ناو یاریگا و تەنیا لە دوورەوە پاڵپشتی تیمەکەی بکات.

گەورەیی لە تۆپی پێ و پاشەکشە لە ئابووریدا

وڵاتی ئەرجەنتین لە جیهانی تۆپی پێدا پێش وڵاتە زلهێزەکانی وەک ئەمریکا، چین و ڕووسیا دەکەوێت و بەگوێرەی ڕیزبەندی فیفا بۆ ساڵی 2026، باشترین تیمی جیهانە. ئەرجەنتین دووەم گەورەترین وڵاتی ئەمریکای لاتین و 8هەمین گەورەترین وڵاتی جیهانە. سەرەڕای ئەم ناوبانگە وەرزشییە، لە ڕووی ئابوورییەوە لە پلەی 55هەمدایە و لە ڕووی هێزی سیاسی و ستراتیژیشەوە پلەی 28هەمی جیهانی گرتووە. ڕێژەی هەڵاوسان لەم وڵاتە لە کۆتایی ساڵی 2023 گەیشتە زیاتر لە 200%، بەڵام لە نیوەی یەکەمی ئەمساڵدا بۆ 33.5% دابەزیوە.

گۆڕانکاریی سیاسی و پەیوەندییە نێودەوڵەتییەکان

لە ڕووی سیاسییەوە، ئەرجەنتین پێش ساڵی 2023 لەژێر حوکمی چەپڕەوەکاندا بوو و بە وڵاتێکی داخراو و پڕ لە قەیرانی دارایی هاوشێوەی ڤەنزوێلا دەناسرا. لە ساڵی 2023دا خافێر میلی بە زۆرینەی دەنگ بووە سەرۆک و هەنگاوی بۆ کرانەوەی ئابووری و سیاسی نا. میلی پەیوەندییەکی توندی لەگەڵ دۆناڵد ترەمپ و ئیسرائیل هەیە، بە جۆرێک کە بنیامین نەتانیاهوو سەرۆکوەزیرانی ئیسرائیل پاڵپشتی خۆی بۆ ئەرجەنتین لە یارییەکەی ئەمشەودا دەربڕیوە.

ترسی "موفا" و هۆکاری ئامادەنەبوونی سەرۆک

خافێر میلی سەرۆکی ئەرجەنتین بڕیاریداوە ئامادەی یاریی کۆتایی نەبێت، ئەمەش بەهۆی بیروباوەڕێکی کۆنەوەیە کە پێی دەگوترێت "موفا" یان بەختی خراپ. ئەرجەنتینییەکان پێیان وایە ئامادەبوونی سەرۆک لە یاریگا دەبێتە هۆی دۆڕانی تیمەکە. ئەمە لەوەوە سەرچاوەی گرتووە کە لە مۆندیالی 1990، کارلۆس مێنێم سەرۆکی ئەو کاتە سەردانی یاریزانانی کرد و پاشان ئەرجەنتین لە یەکەم یارییدا بە کامیروون دۆڕا. هەر بۆیە لە ساڵی 1990ەوە تاوەکو ئێستا کە چوار جار گەیشتوونەتە یاریی کۆتایی، هیچ سەرۆکێکی ئەو وڵاتە نەچووەتە یاریگا.

ڕێوشوێنەکان و میوانە بەشداربووەکانی یارییەکە

یارییەکە ئەمشەو کاتژمێر 22:00 بە کاتی هەرێمی کوردستان بەڕێوەدەچێت. بڕیارە دۆناڵد ترەمپ سەرۆکی ئەمریکا، کلاودیا شەینباوم سەرۆکی مەکسیک، پێدرۆ سانچێز سەرۆکوەزیرانی ئیسپانیا و فلیپی دووەم شای ئیسپانیا ئامادەی یارییەکە بن. لەم یارییەدا ئەرجەنتین کە یەکەمی جیهانە ڕووبەڕووی ئیسپانیا دەبێتەوە کە دووەمی ڕیزبەندی فیفایە، بۆ ئەوەی بزانرێت ئەرجەنتین دەتوانێت بۆ جاری 4ەم ببێتە پاڵەوانی مۆندیال یان نا.