ئەندامێکی سەرکردایەتیی یەکێتی جەخت لە گرنگیی ناوەڕۆکی پەیامەکەی سەرۆکی حزبەکەی دەکاتەوە و ڕایدەگەیەنێت، یەکڕیزیی ناوخۆیی خاڵی سەرەکیی پەیامەکە بووە بۆ تێپەڕاندنی دۆخەکە.

ناوەڕۆک و ئاڕاستەی پەیامەکە

لەتیف نێروەیی، ئەندامی سەرکردایەتیی یەکێتیی نیشتمانیی کوردستان لە لێدوانێکدا بۆ کەناڵ8 ڕایگەیاند، پەیامەکەی بافڵ جەلال تاڵەبانی لەبارەی هێرشەکانی ئێرانەوە لەم کاتەدا بایەخێکی زۆری هەیە. ئاماژەی بەوەش کرد کە ئەم پەیامە بە ڕوونی ئاڕاستەی دەرەوەی هەرێمی کوردستان و لایەنە سیاسییەکانی ناوخۆ کراوە، تاوەکو هەمووان لە مەترسییەکانی قۆناغەکە تێبگەن.

گرنگیی یەکڕیزیی نیشتمانی

بە گوتەی ئەو ئەندامەی سەرکردایەتیی یەکێتی، ئەوەی لە پەیامەکەدا بۆ ناوخۆی هەرێم زۆر گرنگ بووە، پرسی یەکبوون و یەکڕیزییە کە لە پەیامەکەدا ڕەنگی داوەتەوە. لەتیف نێروەیی جەختی لەوە کردەوە کە دۆخی ئێستای هەرێمی کوردستان پێویستی بەوە هەیە سەرجەم لایەنە سیاسییەکان هەڵوێستێکی هاوبەشی نیشتمانییان هەبێت بۆ ڕووبەڕووبوونەوەی پێشهاتەکان.