عێراق سەرەڕای هەبوونی سامانی سروشتی، هێشتا لە نیوەی کۆتایی ڕیزبەندیی وڵاتانی جیهاندایە بۆ ئاستی خۆشگوزەرانی و گەشەسەندنی ئابووری و کۆمەڵایەتی.

پێوەری گەشەسەندنی جیهانی

ئەنجوومەنی ئەتڵەنتیک لەسەر بنەمای پێوەرەکانی ئابووری، کۆمەڵایەتی و دامەزراوەیی، ئاستی پەرەپێدانی لە 171 وڵاتی جیهانی بۆ ساڵی 2026 بڵاوکردەوە. لەم ڕیزبەندییە جیهانییەدا عێراق پلەی 106ـی گرتووە، کە ئەمەش نیشانەی خاویی گەشەسەندنە بەراورد بە وڵاتانی تری ناوچەکە.

پێگەی عێراق لەنێو وڵاتانی عەرەبیدا

لەسەر ئاستی وڵاتانی عەرەبی، عێراق لە پلەی 14ـەم دێت. وڵاتانی کەنداو بەردەوامن لە پێشەنگی وڵاتانی عەرەبی؛ ئیمارات پلەی 35ـی جیهانی گرتووە، دواتریش وڵاتانی قەتەر، کوەیت، عومان و سعوودیە دێن. هاوكات عێراق لە دوای وڵاتانی جەزائیر، تونس، لوبنان، میسر، مەغریب و لیبیاوە دێت.

بەراوردکاری لەگەڵ وڵاتانی پاشکۆ

هەرچەندە عێراق لە زۆربەی وڵاتانی عەرەبی دواکەوتووە، بەڵام لە ڕیزبەندییەکەدا کەوتووەتە پێش هەریەکە لە وڵاتانی سووریا، مۆریتانیا، یەمەن و سوودان، کە بەدەست جەنگ و قەیرانی ناوخۆیی توندەوە دەناڵێنن.

هۆکارەکانی پاشەکشەی ئاستی خۆشگوزەرانی

بەپێی ڕاپۆرتەکە، چەند هۆکارێکی سەرەکی لە پشت نزمبوونی ئاستی خۆشگوزەرانی عێراق و هەرێمی کوردستانەوەن. دیارترینیان بریتین لە: خراپیی دۆخی مووچە و شایستە داراییەکان، قەیرانی سووتەمەنی و نۆرەگرتنی هاووڵاتییان، نەبوونی خزمەتگوزارییە سەرەتاییەکان و ئەو گەندەڵییە گەورەیەی لە دامودەزگاکانی دەوڵەتدا ڕەنگی داوەتەوە. ئەم هۆکارانە پێکەوە وایان کردووە وڵاتەکە لە پلەی 106ـەمدا بمێنێتەوە.