ستیفان دوجاریک، گوتەبێژی سکرتێری گشتیی نەتەوەیەکگرتووەکان نیگەرانیی قووڵی خۆی لە هەڕەشە نوێیەکانی حوسییەکان بۆ سەر ئازادیی کەشتیوانی لە دەریای سوور دەربڕی و ڕایگەیاند، ئەم ڕەفتارانە مەترسیی پەرەسەندنی ئاڵۆزییەکانی ناوچەکە زیاتر دەکەن و لێکەوتەی زۆر توندیان بۆ بازرگانی و هاوکارییە مرۆییەکان دەبێت.

سەپاندنی گەمارۆ لەلایەن حوسییەکانەوە

دوێنێ (دووشەممە 21/7/2026) حوسییەکانی یەمەن گەمارۆی دەریاییان بەسەر سعودیەدا سەپاند، ئەوەش دوای ئەوەی هەفتەی ڕابردوو گرژییەکانی نێوانیان سەریهەڵدایەوە و ئاگربەستی 4 ساڵەی نێوان ئەو دوو لایەنە ڕاگەیەنرا.

داواکاری بۆ پەنابردنە بەر دیپلۆماسی

ستیفان دوجاریک لەبارەی ڕێگەچارەی ئاڵۆزییەکانەوە گوتی: "داوا دەکەین دەستبەجێ پەرەسەندنی کێشەکان کەم بکرێتەوە و لە ڕێگەی دیالۆگ و دیپلۆماسییەوە چارەسەری ناکۆکییەکان بپێکڕێت."

ڕێزگرتن لە بڕیارنامە نێودەوڵەتییەکان

گوتەبێژی سکرتێری گشتیی نەتەوەیەکگرتووەکان لەبارەی ڕێزگرتن لە سەروەریی یاسای نێودەوڵەتییەوە گوتی: "دووپاتی دەکەینەوە کە بڕیارنامەی 2722ـی ئەنجوومەنی ئاسایش و بڕیارنامەکانی دواتر کە پەیوەندییان بە هێرشەکانی حوسییەکانەوە هەیە دژی کەشتییە بازرگانییەکان، دەبێت بە تەواوی ڕێزیان لێ بگیرێت."

لێکەوتە مەترسیدارەکانی گەمارۆدان

ستیفان دوجاریک لەبارەی هاتوچۆی دەریایی لە شوێنە ستراتیژییەکاندا هۆشداریدا و گوتی، گەمارۆدانی دەریای سوور کە خاڵێکی سەرەکیی دیکەی هاتوچۆی دەریاییە هاوشێوەی گەرووی هورمز، لێکەوتەی توندی دەبێت.

کاریگەری لەسەر هاوکارییە مرۆییەکان

سەبارەت بە زیانە ئابووری و مرۆییەکانیش، ناوبردراو گوتی: "ئەو گەمارۆ دەریاییە کاریگەریی هەستپێکراوی لەسەر ڕەوانەکردنی کاڵا مرۆییەکانی نەتەوەیەکگرتووەکان و پرۆسەی بازرگانی بەگشتی دەبێت."