ئەمڕۆ سێشەممە، باسم محەممەد خزەیر وەزیرى نەوتى عێراق بە نوسراوى فەرمى داواى لە ئەنجوومەنى نوێنەران کردووە میوانداریی بکەن بۆ ڕوونکردنەوەى پلانى وەزارەتەکەى لە دۆسییە جیاوازەکانی نەوت و وزەدا.

ئامادەیی بۆ وڵامدانەوەی سەرجەم ئەندامانی ئەنجوومەنی نوێنەران

وەزارەتى نەوتى عێراق ڕایگەیاندووە، باسم محەممەد خزەیر ئامادەیی دەربڕیوە وەڵامى سەرجەم ئەندامانى ئەنجوومەنى نوێنەران بداتەوە لەهەر بابەتێکى پەیوەست بە دۆسییەى نەوت و گاز.

شەفافیەت و هەماهەنگی لە نێوان دامەزراوەکان

وەزارەتەکە دەڵێت، "ئەم هەنگاوە نیشانەى شەفافیەت و هەماهەنگییە لەنێوان دامەزراوەکان و ئەو پرسیارانەى هاوڵاتییان لەسەر کارى دامەزراوە حکومییەکان هەیانە.

لەعێراق دەستبەکاربوونى حکومەتى نوێ هاوکاتبوو لەگەڵ سەرهەڵدانى قەیرانى دارایی و ڕاوەستانى هەناردەى نەوت بەهۆى جەنگى ئەمریکا و ئیسرائیل لەگەڵ ئێران، جگە لەکەمبوونەوەى داهاتەکان قەیرانى دابینکردنى سووتەمەنى و گرانبوونى نرخەکەى لە عیراق و هەرێمى کوردستان سەریهەڵدا، ئەگەرچى حکومەتى فیدراڵ بەشێک لە قەیرانى بەرهەمەنەوتییەکانى چارەسەرکردووە، بەڵام قەیرانەکە لەهەرێمى کوردستان بەرەو قوڵبوونەوە دەڕوات و نرخى سەرجەم جۆرە جیاوازەکانى سووتەمەنى بەردەوام لە بەرزبوونەوەدایە.