دوای هەڕەشەکانی گرووپی حوسییەکانی یەمەن بۆ سەر کەشتیگەلە بازرگانییەکان، دوو بارهەڵگری نەوتی سعودیە کە بەرەو وڵاتانی ئاسیا بەڕێوەبوون، ناچاربوون ئاراستەی خۆیان بگۆڕن، ئەمەش هاوکاتە لەگەڵ پەرەسەندنی ئاڵۆزییەکان لە دەریای سوور و هەڕەشەی ڕاستەوخۆی ئەمریکا بۆ پاراستنی نێودەوڵەتیی ڕێڕەوە ئاوییەکان و بەرپەرچدانەوەی هەر پەکخستنێکی هاتوچۆی دەریایی.

سەپاندنی گەمارۆی دەریایی بەسەر سعودیەدا

حوسییەکان کە کۆنترۆڵی باکوور و ڕۆژئاوای یەمەن دەکەن و دەروازەی دەریای سووریشیان لەژێردەستدایە، ڕۆژی دووشەممە گەمارۆی دەریاییان خستە سەر سعودیە و بەرەیەکی دیکەی جەنگییان لە ڕۆژهەڵاتی ناوەڕاست و کەنداو کردەوە.

هەڕەشەکان و گەڕانەوەی کەشتییەکان

لە پەیامێکدا بۆ کەشتیوانەکان، حوسییەکان هەڕەشەی هێرشکردنە سەر کەشتییە نەوتهەڵگرەکانی سعودیەیان کرد. بەهۆی هەڕەشەی حوسییەکانەوە تاوەکو ئێستا دوو بارهەڵگری نەوتی سعودیە کە بەرەو چین و هیندستان دەچوون، گەڕاونەتەوە بۆ بەندەرەکانی سعودیە و بە ئاراستەی کەناڵی سوێس دەڕۆن.

هەڵوێست و هۆشدارییەکانی واشنتن

دۆناڵد ترەمپ، سەرۆکی ئەمریکا لەبارەی هەڕەشەکانی حوسییەکان و مەترسییەکانی سەر ڕێڕەوی کەشتیوانی ڕایگەیاند، حوسییەکان هێشتا گەرووی بابولمەندەبیان لە دەریای سوور دانەخستووە، بەڵام ئەگەر شتێکی لەو جۆرە ڕووبدات، ئەوان دەزانن چۆن مامەڵەی لەگەڵدا بکەن.

گرنگیی جوگرافی و ستراتیژیی بابولمەندەب

گەرووی بابولمەندەب دەکەوێتە دەروازەی باشووری دەریای سوور، کەنداوی عەدەن و زەریای هیندی بەیەکەوە دەبەستێتەوە. پانی گەرووەکە لە نێوان 26 بۆ 32 کیلۆمەتردایە، بەڵام ڕێڕەوی کەشتیوانی لە تەسکترین خاڵدا بۆ نزیکەی 2 میل دەریایی کەم دەبێتەوە. ئەم تایبەتمەندییە وایکردووە ببێتە ڕێڕەوێکی هەستیار کە هەر پشێوییەکی ئەمنی تێیدا دەبێتە هۆی پەککەوتنی هاتوچۆی دەریایی.