وڵاتانی کەنداو و ئوردن لەبارەی هێرشەکانی ئێرانەوە ڕایانگەیاند، هێرشی ئێران بۆ سەریان لە ڕۆژی 28ـی شوباتی 2026ـەوە بەردەوامە. هەروەها جەختیان کردەوە کە دوای واژۆکردنی لێکگەیشتن لەگەڵ ئەمریکا لە 17ـی حوزەیرانی 2026، هێرشەکان زیاتربوون و وێستگەکانی وزە، ئاو، بەندەر و فڕۆکەخانەکان کراونەتە ئامانج، بەتایبەت لە بەحرەین، کوەیت و ئوردن.

پێشێلکردنی یاسا و بڕیارە نێودەوڵەتییەکان

ئەو حەوت وڵاتە لەبارەی یاساییبوونی کردارەکانی ئێرانەوە گوتیان، دەستدرێژییەکانی ئێران پێشێلکردنی جاڕنامەی نەتەوە یەکگرتووەکان، یاسای نێودەوڵەتی و مرۆیی و بڕیاری ژمارەی 2817ـی ساڵی 2026ـی ئەنجوومەنی ئاسایشە، هەروەها پێچەوانەی خودی ئەو لێکگەیشتنەیە کە ئێران و ئەمریکا واژۆیان کردووە.

مافی بەرگری لە خۆکردن و پاراستنی سەروەری

وڵاتانی کەنداو و ئوردن سەبارەت بە پاراستنی سەروەرییەکەیان ڕایانگەیاند، بە مافی خۆیانی دەزانن بەشێوەی تاک تاک یان بە کۆمەڵ بەرگری لە خۆیان بکەن پاڵپشت بە ماددەی 51 لە جاڕنامەی نەتەوە یەکگرتووەکان و هەموو ڕێکارێکی یاسایی بگرنەبەر بۆ پاراستنی سەروەریی خاکەکەیان، هاوڵاتییانیان و کەشتییە بازرگانییەکان.

پێشوازیکردن لە بڕیارەکەی حکومەتی عێراق

ئەو حەوت وڵاتە عەرەبییە لەبارەی ڕێکارەکانی بەغداوە گوتیان، پێشوازی لە بڕیاری حکومەتی عێراق دەکەن بۆ کۆنترۆڵکردنی چەک لە دەستی دەوڵەتدا، پشتیوانی لەو ڕێکارانەش دەکەن کە حکومەت ئەنجامیان دەدات بۆ ڕێگرتن لە دووبارەبوونەوەی هێرشی گرووپە چەکدارەکانی نزیک لە ئێران دژی وڵاتانی ناوچەکە.

داواکاریی بەپەلە لە ئەنجوومەنی ئاسایش

ئەو وڵاتانە لەبارەی ڕۆڵی ئەنجوومەنی ئاسایشەوە ڕایانگەیاند، داوا لە ئەنجوومەنی ئاسایش دەکەن بەپەلە داوای ڕاگرتنی دەستبەجێی هێرشەکانی ئێران بکات، هەروەها ماف بداتە وڵاتانی زیانلێکەوتوو بەرگری لە خۆیان بکەن.

ستایشکردنی هێزەکان و پابەندبوون بە ئاسایشی دەریایی

وڵاتانی کەنداو و ئوردن لەبارەی ئاسایشی ناوچەکەوە گوتیان، ستایشی ئامادەباشیی هێزە چەکدارەکانیان دەکەن، یەکگرتوویی نێوان هاوڵاتییەکانیان بەرز دەنرخێنن و جەخت لە پابەندبوون بە سەلامەتیی کەشتیوانی لە گەرووی هوورمز و بابولمەندەب دەکەنەوە، لەگەڵ کارکردن لەگەڵ وڵاتانی دراوسێ و ناوچەکە و ڕێکخراوی دەریاوانیی نێودەوڵەتی بۆ پاراستنی ئاسایش و سەقامگیریی نێودەوڵەتی.

پشتیوانیکردنی سعودیە و ستایشی هەوڵەکانی عوممان

ئەو وڵاتانە لەبارەی هەڵوێستیان بۆ سعودیە و عوممان ڕایانگەیاند، پشتیوانیی تەواو لە سعودیە دەکەن بۆ هەر ڕێکارێک دەیگرێتەبەر لەپێناو پاراستنی ئاسایش، سەروەری و سەقامگیرییەکەی، لەگەڵ ستایشکردنی ئەو هەوڵانەی عوممان دەیاندات بۆ گەیشتن بە چارەسەرێکی سیاسیی گشتگیر و هەمیشەیی لە لوبنان.