عەلى فالح زەیدى، سەرۆکوەزیرانى عێراق، دواى سەردانێکى یەک ڕۆژە بۆ تاران گەڕایەوە بەغداد، بە پێچەوانەى سەردانەکەى بۆ ئەمریکا کە دەیان دیدار و کۆبوونەوە و واژۆکردنى 48 ڕێککەوتنى تێدا کرا، لە سەردانەکەیدا بۆ تاران تەنیا چوار کۆبوونەوەى کرد و ڕێککەوتنامەیەک و سێ یاداشتنامەى لێکتێگەیشتن لە نێوان هەردوو وڵات واژۆکرا.

سەردانکردنى تاران

زەیدى ڕۆژى پێنجشەممە بە یاوەرى ژمارەیەک وەزیر و بەرپرسى حکومەتەکەى، سەردانى تارانى کرد، لە یەکەم وێستگەى سەردانەکەیدا لەگەڵ مەسعود پزیشکیان سەرۆککۆمارى ئێران کۆبووەوە، دواتریش پزیشکیان و زەیدى، سەرپەرشتیی کۆبوونەوەى باڵاى هەردوو حکومەتییان کرد.

ڕێککەوتنى ئابووریی و بازرگانی

دواى کۆبوونەوەکەش، ڕێککەوتنامەیەک لە بوارى کارگۆ و گواستنەوەى زەمینى، یاداشتنامەیەک بۆ ڕاکێشانى هێڵى شەمەندەفەر لە کرماشانەوە بۆ خوسرەو- خانەقین- بەغداد، یاداشتنامەیەک بۆ دەستەخوشکى بەغداد و تاران و یاداشتنامەیەکى دیکەش لەبوارى کارگێڕیی حکومەت و ڕاهێنان بە سەرچاوە مرۆییەکان واژۆکران.

کۆبوونەوە لەگەڵ بەرپرسانى باڵا

هەر لە سەردانەکەیدا بۆ تاران، زەیدى لەگەڵ محەممەد باقر قاڵیباف، سەرۆکى پەرلەمانی ئێران و غوڵام حسێن موحسینى ئێژەیی، سەرۆکى دەسەڵاتى دادوەرى ئێران کۆبووە و هەمان ڕۆژ گەڕایەوە بەغداد.

سەردانێکى کورت بەڵام بەرهەمدار

سەردانەکەى زەیدى بۆ تاران کورت و کەم بەرهەمبوو، بە پێچەوانەى سەردانەکەى بۆ ئەمریکا کە جگە لەوەى پێنج ڕۆژى خایاند، زیاد لە 30 دیدار و کۆبوونەوەى لەگەڵ سەرۆک و ژمارەیەک وەزیر و کۆمپانیا و دامەزراوە گەورەکانى ئەو وڵاتە لە بوارى وزە و تەکنەلۆجیا و دارایی و بانک ئەنجامدا. لە کۆتایی سەردانەکەى ئەمریکاش 48 ڕێککەوتننامە لە نێوان عێراق و کۆمپانیاکانى ئەمریکا لە بوارى نەوت و وزە و تەکنەلۆجیا و بانک واژۆکران، کە بەهاکەیان دەگاتە 60 ملیار دۆلار.

بەراوردى سەردانى ئەمریکا و ئێران

ئەگەر بەراوردى هەردوو سەردانەکەى زەیدى بۆ ئەمریکا و ئێران بکەین، جیاوازى زۆر لە نێوانیاندا هەیە، بۆ نموونە لە ڕووى کات و ژمارەى کۆبوونەوەکانەوە جیاوازییەکى زۆریان هەیە، زەیدى لە ئەمریکا زیاد لە 30 کۆبوونەوەى کردووە، بەڵام لە تاران تەنیا چوار کۆبوونەوەى کرد.

ڕێککەوتنەکانى تاران و واشنتن و بەهاى ڕێککەوتنەکان

هەروەها لە ئەمریکا 48 ڕێککەوتننامە لە بوارەکانى نەوت و وزە و تەکنەلۆجیا و بانک و دارایی واژۆکران، بەڵام لە تاران تەنیا ڕێککەوتننامەیەک و سێ یاداشتنامە کە لە بوارى کارگێڕى و گواستنەوەدان واژۆکرا.

بەهاى ڕێککەوتنەکانى عێراق و ئەمریکا دەگاتە 60 ملیار دۆلار، بەڵام بەهاى رێککەوتن و یاداشتنامەکان لەگەڵ ئێران بەهاکەى دیاریی نەکراوە.

ئەوەش لە کاتێکدایە، ئەمریکا و ئێران لە جەنگدان دژ بە یەکدى و عێراق هەوڵدەدات کەناڵى پەیوەندى دیپلۆماسى لە نێوانیاندا بکاتەوە و شەڕ و ئاڵۆزییەکانى ناوچەکە بەرەو هێورکردنەوە ببات.