وەزارەتی ناوخۆی عێراق، ڕایگەیاند، لە شەش مانگدا ڕێگرییان لە 930 حاڵەتی بە قاچاغبردن کردووە و زیاد لە هەزار تۆمەتباریش دەستگیرکراون.

دەرخەری توانای هێزە ئەمنییەکان

محەممەد عەلی، گوتەبێژی وەزارەتەکە ڕایگەیاند، لە شەش مانگی یەکەمی ئەمساڵدا و لە چوارچێوەى بەرەنگاربوونەوەی "تاوانی ڕێکخراو" 69 حاڵەتی ساختەکردنی دراو ئاشکراکراون و بەهۆیەوە 92 کەس دەستگیرکراون، هەروەها 50 حاڵەتی ساختەکردنی دیکە هەبووە و 61 تۆمەتبار دەستگیرکراون.

دەرمانى نایاسایی

هەروەها لەو ماوەیەدا 215 کارتۆن دەرمانی نایاسایی دەستی بەسەرداگیراوە و 226 تۆمەتبار لەسەری دەستگیرکراون.

ئامارى 6 مانگى ئەمساڵ

گوتەبێژی وەزارەتی ناوخۆ ئاماژەى بەوەکردووە، لە شەش مانگدا 11 چالاکی بازرگانی بە مرۆڤەوە ئاشکرا کراوە و 17 تۆمەتباری لەسەری دەستگیرکراون و ڕێکاری یاسایی لەبەرامبەریان گیراوەتەبەر.

لە بەدواداچوونی ئەو کەسانەی کە بە نایاسایی ماونەتەوە 69 حاڵەت هەبووە و تیایدا 181 تۆمەتبار دەستگیرکراون و ڕێکاریی یاساییان لەبەرامبەر گیراوەتەبەر.