ڕۆژنامەی وۆڵ ستریت جۆرناڵی ئەمریکی، ئاشکراى کردووە، ترەمپ گەیشتووەتە ئەو بڕوایەی ئێرانییەكان جگە لە "زمانی هێز" لە هیچی دیکە تێناگەن و سەرکردەکانیشى بە "شێت" ناوبردووە و هەڕەشەى بەردەوامى هێرشەکانى کردووە.

ترەمپ گومانى هەیە

ڕۆژنامەکە لە زاری بەرپرسێکی ئەمریکاوە بڵاویکردووەتەوە، ئێستا ترەمپ گومانەکانی زیاتر بووە لەوەی ڕێگەى دیپلۆماسی لەگەڵ ئێران سوودی هەبێت و بگەنە ئەنجام و خواستى ئەوەی هەیە ئاڕاستەیەکى توندتر بگرێتەبەر.

ترەمپ تووڕەیە

ئاماژە بەوەشکراوە، ترەمپ لە کۆبوونەوەیەکی ئەمدواییانەدا لە ئۆفیسی كۆشكی سپی، هێرشێکی توندی كردووەتە سەر سەرکردەکانی ئێران و بە "شێت" ناویبردوون و گوتوویەتی، "ئێران تەنیا لە هێزی سەربازی تێدەگات".

ئەو بەرپرسە باسی لەوەشکردووە، ترەمپ بۆچوونى وایە جگە لە بەردەوامیدان بە هێرشە سەربازییەکان، هیچ بژاردەیەکی باشتر نییە.

جەنگى ئێران و کاریگەرى لەسەر کەسایەتى ترەمپ

ڕۆژنامەکە لە زاری سەرچاوە ئەمریکییەکانەوە بڵاویکردووەتەوە جەنگى ئێران کاریگەری کەسی لەسەر ترەمپ و ژمارەیەک ڕاوێژکاری باڵای دروستکردووە و بە تایبەتی کە هۆشداری هەواڵگری هەیە لە هەڕەشەی ئێران بۆ تیرۆرکردنیان.

ئەگەرەکانى ڕێککەوتن لەگەڵ ئێران

بە گوێرەى دوو سەرچاوەی ئەمریکی، سەرەڕاى نیگەرانییەکانى ترەمپ، بەڵام جارێد کوشنەر و ستیڤ ویتکۆف، سەرەڕای لاوازبوونی دەرفەتەکانی ڕێڕەوی دیپلۆماسی، هێشتا بۆچوونیان وایە ڕێککەوتن لەگەڵ ئێران ئەگەری هەیە.