وەزیری دەرەوەی ئێران ڕایدەگەیەنێت کە وڵاتەکەی لە بەرگریکردن لە بەرژەوەندییە نیشتمانییەکانی سوورە و نائارامییەکانی گەرووی هورمزیش بۆ پابەندنەبوونی واشنتن بە بەڵێنەکانی دەگەڕێنێتەوە.

دیداری عێراقچی و لاڤرۆڤ لە قرغیزستان

ئێوارەی ڕۆژی هەینی 24-07-2026، عەباس عێراقچی، وەزیری دەرەوەی ئێران، لە پەراوێزی کۆبوونەوەی ڕێکخراوی هاریکاری شانگهای لە قرغیزستان، لەگەڵ سێرگی لاڤرۆڤ، وەزیری دەرەوەی ڕووسیا کۆبووەوە. لەم دیدارەدا عێراقچی جەختی لەوە کردەوە کە تاران هەروەک چۆن لە دیپلۆماسییەتدا جدییە، بە هەمان شێوەش لە بەرگریکردن لە ئاسایشی نیشتمانیی وڵاتەکەی پێداگرە.

پێگەی ستراتیژیی گەرووی هورمز

وەزیری دەرەوەی ئێران گەرووی هورمزی وەک چەقی ململانێکانی نێوان تاران و واشنتن وەسف کرد. عێراقچی ڕایگەیاند کە ڕێگە بە هیچ جۆرە دەستوەردانێک یان خراپ بەکارهێنانی ئەم تەنگەیە لەلایەن ویلایەتە یەکگرتووەکانی ئەمریکاوە نادەن و پاراستنی ئاسایشی ئەو ناوچەیە بە ئەرکی خۆیان دەزانن.

تۆمەتبارکردنی واشنتن بە بەڵێنشکێنی

عێراقچی ئەمریکای بە "بەڵێنشکێنی" و پێشێلکردنی خاڵەکانی یاداشتنامەی لێکتێگەیشتنی ئیسلام ئاباد تۆمەتبار کرد. بە گوتەی وەزیری دەرەوەی ئێران، نائارامییەکانی ئێستای گەرووی هورمز و ناوچەکە لێکەوتەی ڕاستەوخۆی پابەندنەبوونی واشنتنە بەو بەڵێنانەی کە پێشتر داویەتی.

پێشنیازی ڕووسیا بۆ میکانیزمێکی ئەمنی

لە بەرامبەردا، سێرگی لاڤرۆڤ، وەزیری دەرەوەی ڕووسیا، سەرکۆنەی هێرشەکانی ئەمریکا و ئیسرائیلی بۆ سەر خاکی ئێران کرد. لاڤرۆڤ ئامادەیی مۆسکۆی دەربڕی بۆ هاوکاری لە درووستکردنی "میکانیزمێکی ئەمنی" کە پشت بە وڵاتانی ناوچەکە ببەستێت، بە مەبەستی هێورکردنەوەی گرژییەکان و گەڕاندنەوەی سەقامگیری.

دۆخی مەیدانی و پاشخانی هێرشەکان

ئەم دیدارە لە کاتێکدایە کە ئەمریکا بۆ ماوەی 13 شەو بەبەردەوامی هێرشی کردووەتە سەر ناوچە جیاجیاکانی ئێران، هەرچەندە لە شەوی ڕابردوودا هیچ هێرشێک تۆمار نەکراوە. ئەمریکا ئامانجی هێرشەکانی بۆ لێدان لە ژێرخانی سەربازیی ئێران و کردنەوەی ڕێڕەوێکی ئازاد بۆ کەشتییە بازرگانییەکان لە گەرووی هورمز گەڕاندووەتەوە، لە بەرامبەریشدا ئێران بە درۆن و مووشەک بەرژەوەندییەکانی ئەمریکای کردووەتە ئامانج.