لە سلێمانی دەرزییەک لە میزڵدانی منداڵێک دەرهێنرا
پاش ئەوەی دایکوباوکی منداڵێکی 10 ساڵ زانییان دەرزییەک لە جەستەی منداڵەکەیاندایە، سەردانی نەخۆشخانەیان کرد و بە ناوبینی دەرزییەکە دەرهێنرا.
منداڵێکی تەمەن 10 ساڵ لە یەکێک لە شارۆچکەکانی کوردستان، دەرزییەکی خستووەتە ناو بۆریی میزییەوە و گەیشتووەتە میزڵدانی.
دایکوباوکی منداڵەکە پاش ئەوەی زانییان ئەم حاڵەتە ڕووی داوە، دەستبەجێ سەردانی نەخۆشخانەی شارۆچکەکەیان کرد، لەوێ هەوڵدرا دەرزییەکە دەربهێنرێت بەڵام نەتوانرا و ڕەوانەی نەخۆشخانەی شار کرا لە شاری سلێمانی.
پاش پشکنینەکان دەرکەوت دەرزییەکە لە میزڵدانی گیری خواردووە، هەربۆیە دەستبەجێ لە ژێر بێهۆشکاریی گشتیدا، تیمێکی پسپۆڕی گورچیلە و میزەڕۆ لە ڕێگەی ناوبینییەوە دەرزییەکەیان دەرهێنا.
تیمەکە پێکهاتبوون لە د. کاردۆ حەسەن، پزیشکی پسپۆڕی گورچیلە و میزەڕۆ و هەریەکێک لە د. نیگا ئاراس و د. ڕێبین ئەحمەد پزیشکانی نیشتەجێی دێرین.
لە ئێستادا دۆخی منداڵەکە باش و جێگیرە و بە تەواوی چارەسەرە پێویستەکانی بۆ کراوە، بەڵام ئەگەر دەستبەجێ چارەسەر نەکرایە، دەکرا دەرزییەکە ببێتەهۆی دڕانی میزڵدانی منداڵەکە و هەوکردنی توندی جەستەی لێبکەوێتەوە، کە حاڵەتێکی مەترسیدارە.
4 کاتژمێر پێش ئێستا