وەزارەتی نەوتی ئێران داهاتی فرۆشتنی نەوتی لە سەردەمی شەڕ و ئاگربەستدا بە 18 ملیار دۆلار ڕاگەیاند، کە ئەمەش زیاتر لە 60%ی داهاتی پێشبینیکراوی نەوت لە بودجەی ساڵانەی وڵاتەکەدا پێکدەهێنێت، سەرەڕای ئەوەی پێشتر ئاماژە بە ئاستەنگیی گەورە لە هەناردەکردندا کرابوو.

ووردەکاریی داهاتەکان لە سەردەمی شەڕ و ئاگربەستدا

وەزارەتی نەوتی ئێران لەبارەی وردەکاریی فرۆشی نەوتەوە لە ڕاگەیێنراوێکدا ئاماژەی بەوە کردووە، لە کاتی شەڕدا بە بەهای 11 ملیار و 500 ملیۆن و لە کاتی ئاگربەستیشدا بە بڕی 6 ملیار و 500 ملیۆن دۆلار نەوتی فرۆشتووە.

ڕێژەی بەدەستهاتووی داهات لە بودجەی ساڵانەدا

وەزارەتەکە لەبارەی بڕی داهاتی بەدەستهاتوو لە بودجەدا ئاماژەی بەوەش کردووە، ئەمە زیاتر لە 60%ی داهاتی نەوتی پێشبینیکراو لە بودجەی ساڵدا پێکدەهێنێت.

لێدوانی پێشتری سەرۆکی پەرلەمانی ئێران لەبارەی گەمارۆکانەوە

ئەمە لە کاتێکدایە لە کۆتایی مانگی حوزەیرانی ئەمساڵدا، محەممەد باقر قالیباف، سەرۆکی پەرلەمان و گەورە دانوستانکاری ئێران لەبارەی هەناردەی نەوتەوە ڕایگەیاندبوو، لە کاتی گەمارۆی ئەمریکا بۆ سەر بەندەرەکان نەیانتوانیوە هیچ نەوتێک هەناردە بکەن.

کاتی دەستپێکردنی هێرشەکان و سەرهەڵدانەوەی ئاڵۆزییەکان

هێرشەکانی ئەمریکا و ئیسرائیل بۆ سەر ئێران لە 28ی شوبات دەستیانپێکرد، ئاگربەستی مانگی نیسان تا ڕادەیەکی زۆر کۆتایی بە شەڕەکە هێنا، بەڵام لە سەرەتای مانگی تەمموزدا ئاڵۆزییەکان سەریانهەڵدایەوە.