وەزارەتی دەرەوەی ئێران ئەنجامی گفتوگۆکانی لەگەڵ شاندی عوممان ئاشکرا دەکات و ڕایدەگەیەنێت، سەرەڕای بەرەوپێشچوونی دانوستانەکان، هیچ گۆڕانکارییەک لە دۆخی هاتوچۆی کەشتییەکان لە ناوچەکە ڕووی نەداوە.

گەڕێکی نوێی دانوستانەکانی تاران و مەسقەت

ڕۆژانی هەینی و شەممە، چەند گەڕێکی دانوستان لە نێوان ئێران و عوممان لە ئاستی جێگری وەزیرانی دەرەوەی هەردوو وڵات لە تاران بەڕێوەچوو. ئیسماعیل بەقائی، گوتەبێژی وەزارەتی دەرەوەی ئێران ڕایگەیاند، ئەم کۆبوونەوانە بونیاتنەر بوون و تێیاندا بیروبۆچوون لەبارەی میکانیزمی هاوبەش بۆ ئیدارەدانی گەرووی هوورمز ئاڵوگۆڕ کراوە.

میکانیزمی بەڕێوەبردنی جووڵەی کەشتییەکان

لە گفتوگۆکاندا تیشک خراوەتە سەر ڕەچاوکردنی مافی خاوەندارێتی وڵاتانی کەناراوەکان و چۆنیەتی ڕێکخستنی هاتووچۆی کەشتییە بازرگانییەکان لە گەرووی هوورمز. بەقائی ئاماژەی بەوە کرد کە گفتوگۆ سوودبەخش بووە و لە داهاتووشدا گفتوگۆ تەکنیکی و سیاسییەکانی نێوان هەردوو وڵات بۆ هەمان مەبەست بەردەوام دەبن.

دۆخی ئێستای گەرووی هوورمز

سەرەڕای پێشکەوتنەکان لە ئاستی دیپلۆماسی، گوتەبێژی وەزارەتی دەرەوەی ئێران دووپاتی کردەوە کە تاوەکو ئێستا هیچ گۆڕانکارییەکی مەیدانی لە دۆخی گەرووی هوورمز ڕووی نەداوە. بەقائی ڕایگەیاند، گەرووەکە وەک پێشتر بە داخراوی ماوەتەوە و شاندی عوممانیش ئێوارەی دوێنێ شەممە پاش تەواوبوونی گەڕی گفتوگۆکان تارانیان بەرەو مەسقەت جێهێشتووە.