دوای چەند ڕۆژێک لە کۆتاییهاتنی مۆندیالی 2026، ئێرلینگ هالاندی ئەستێرەی نەرویجی سەرنجی هاندەرانی لە تۆڕە کۆمەڵایەتییەکاندا بەلای خۆیدا ڕاکێشا، کاتێک لە تۆمارێکدا دەرکەوت بە جۆش و خرۆشەوە بەشداری لە ئاهەنگی هاوسەرگیریی جیانلویجی دۆنارومای گۆڵپارێزی ئیتاڵیی هاوڕێیدا کردووە.

لە ئاهەنگی هاوسەرگیرییەکەی دۆنارومادا، گۆڵکارەکەی مانچێستەر سیتی ڕۆڵی مایسترۆی گێڕا و بە لێدانی دەهۆڵ، سەرکردایەتیی سەمای «ڤایکینگ»ی کرد، هاوشێوەی ئەوەی لە مۆندیالدا لەگەڵ یاریزانانی نەرویج و هاندەرانی ئەو وڵاتەدا کردی، ئەمەش میدیا و ئامادەبووانی سەرسام کرد.

لە ڤیدیۆیەکی 30 چرکەییدا دەردەکەوێت، چەندین ئەستێرەی تۆپی پێ و میوانەکان لە ڕیزدا لەسەر زەوی دانیشتوون و بە هاوئاهەنگی لەگەڵ لێدانی دەهۆڵەکەی هالاند، وەک سەرنشینانی کەشتییە مێژووییەکانی ڤایکینگ، ئاماژەی سەوڵلێدان لەناو کەشتییەکدا نمایش دەکەن.

ئەم دیمەنە دوای ئەوە دێت کە هالاند و هەڵبژاردەی نەرویج لە مۆندیالی 2026دا درەوشانەوە و باشترین ئاستیان پێشکەش کرد، گەیشتنە قۆناغی چارەکی کۆتایی و هەڵبژاردەی بەڕازیلیان لە پاڵەوانێتییەکە کردە دەرەوە. هەر لەو مۆندیالەشدا یادکردنەوەی ڤایکینگەکان لەلایەن نەرویجییەکانەوە بووە هێمایەکی مێژوویی و ڕەنگە لە داهاتوودا مۆندیالەکە بەو نمایشەی نەوەکانی ڤایکینگ بناسرێتەوە.