سەرۆککۆمارى عێراق لە میانی کۆبوونەوەی لەگەڵ سەرۆکوەزیرانی لوبنان ڕایگەیاند، هەڵوێستى عێراق نەگۆڕە لە پاڵپشتیکردنى سەقامگیریی و ئاسایشیی لوبنان. جەختیشی کردەوە، پێویستە زمانی گفتوگۆ جێگەی ململانێ و گرژییەکانى ناوچەکە بگرێتەوە.

جەختکردنەوە لە فراوانکردنى پەیوەندی و هەماهەنگیی نێوان هەردوو وڵات

نووسینگەى ڕۆژنامەوانى، سەرۆکایەتیى کۆمارى عێراق، ڕاگەیێنراوێکى بڵاوکردوەتەوە و تیایدا ئاماژەى بەوەکردووە، نزار ئامێدى، لە کۆشکى سەرۆکایەتى لە بەغداد، لەگەڵ نەواف سەلام، سەرۆکوەزیرانى لوبنان، و شاندى یاوەرى کۆبووەتەوە. تیایدا جەختکراوەتەوە لە فراوانکردنى پەیوەندی و هەماهەنگیی نێوان هەردوو وڵات لە بوارەکانى سیاسی و ئابووری و ڕۆشنبیرى. هەروەها گۆڕانکارییەکانى ناوچەکە قسە و گفتوگۆى لەبارەوە کراوە.

عێراق پاڵپشتی ئاسایش و سەقامگیریی سیاسی و ئابووریی لوبنان دەکات

سەرۆککۆمارى عێراق، دووپاتیکردووەتەوە، عێراق پاڵپشتی ئاسایش و سەقامگیریی سیاسی و ئابووریی لوبنانە. ئاماژەى بەوەشکردووە، پێویستە هاودەنگی نیشتمانی لە لوبنان هەبێت بۆ پەرەپێدانى دامەزراوەکانى دەوڵەت، کە سەروەریی لوبنان و یەکێتى خاکەکەى بێنێتە کایەوە.

گرتنبەری زمانی گفتوگۆ و دیپلۆماسییەت

نزار ئامێدى ڕاشیگەیاندووە، پێویستە ناکۆکی و گرژییەکانى ناوچەکە کۆتایی بێت و زمانى گفتوگۆ و دیپلۆماسییەت بۆ چارەسەرى کێشەکان جێگەی بگرێتەوە.

هاوکات نەواف سەلام، سەرۆکوەزیرانى لوبنان، جەختیکردووەتەوە، لوبنان عێراق وەک هاوبەشێکى عەرەبى و میحوەرى دەبینێت و لە هەوڵى فراوانکردنى ئەو هاوبەشییەیە، تاوەکو لە بەرژەوەندییەکانى هەردوولادا ڕەنگبداتەوە.

 ستایشکردنی هەڵوێستی حکومەت و گەلی عێراق

نەواف سەلام، هەڵوێستەکانى حکومەت و گەلى عێراقی بەرزنرخاندووە لە پاڵپشتیکردنى حکومەت و گەلى لوبنان و چەسپاندنی سەقامگیریی وڵاتەکەیان.

لە کۆبوونەوەکەدا، هەریەک لە فالح سارى، وەزیرى دارایی و باسم عەبادى، وەزیرى نەوت و مستەفا سەنەد، وەزیرى پەیوەندییەکان و سەرۆکى فەرمانگەى عەرەبى لە وەزارەتى دەرەوە، بەشداربوون.