ئامارە فەرمییەکانی وەزارەتی کارەبا ئاستی قەرزی کەڵەکەبووی هاوبەشان لە ناوچە جیاوازەکانی هەرێمی کوردستان ئاشکرا دەکات، کە زۆرترین بڕی قەرز لە پارێزگای سلێمانی تۆمارکراوە.

ئاماری گشتیی قەرزەکان و ژمارەی هاوبەشان

بەگوێرەی داتاکانی وەزارەتی کارەبا، قەرزی گشتیی کارەبا لە هەرێمی کوردستان (بەبێ هەردوو ئیدارەی سۆران و گەرمیان) گەیشتووەتە 2 تریلیۆن و 228 ملیار و 941 ملیۆن دینار. کۆی گشتیی هاوبەشانی کارەبا لە هەرێمی کوردستان 1,822,452 هاوبەشە، بەڵام ئەو قەرزانەی تۆمارکراون تەنیا 1,644,141 هاوبەش دەگرێتەوە.

بڕیاری داشکاندنی 50% بۆ قەرزە کەڵەکەبووەکان

لەسەر بڕیاری ئەنجوومەنی وەزیران، بڕیاردراوە بە ڕێژەی 50% داشکاندن بۆ قەرزە کەڵەکەبووەکانی کارەبا بکرێت. چاوەڕوان دەکرێت لە سەرەتای مانگی داهاتووەوە دەست بە جێبەجێکردنی ئەم بڕیارە بکرێت، بە جۆرێک هەر هاوبەشێک تەنیا نیوەی قەرزەکەی دەداتەوە و نیوەکەی دیکەی لەلایەن حکومەتەوە لێخۆشبوونی بۆ دەکرێت.

قەرزەکان لەسەر ئاستی پارێزگاکان

دابەشبوونی قەرزەکان بەسەر پارێزگاکانی هەرێمی کوردستان بەم شێوەیەیە:

پارێزگای سلێمانی: 1 تریلیۆن دینار قەرز لای 565,164 هاوبەش.

پارێزگای هەولێر: 762.2 ملیار دینار قەرز لای 581,740 هاوبەش.

پارێزگای دهۆک: 268.9 ملیار دینار قەرز لای 258,160 هاوبەش.

پارێزگای هەڵەبجە: 33.8 ملیار دینار قەرز لای 42,432 هاوبەش.

قەرزەکان لە ئیدارە سەربەخۆکانی زاخۆ و ڕاپەڕین

لە بەشێکی دیکەی داتاکاندا، بڕی قەرزەکان لە ئیدارە سەربەخۆکان بەم شێوەیە خراوەتەڕوو:

ئیدارەی زاخۆ: 99.7 ملیار دینار لای 85,368 هاوبەش.

ئیدارەی ڕاپەڕین: 60.1 ملیار دینار لای 111,277 هاوبەش.

ئیدارەکانی سۆران و گەرمیان

بەپێی زانیارییەکانی وەزارەتی کارەبا، لە ئیدارەی سۆران 90,289 هاوبەش و لە ئیدارەی گەرمیان 88,022 هاوبەشی کارەبا هەن. بەڵام بەهۆی ئەوەی پڕۆسەی کۆکردنەوەی داتاکانی تایبەت بە قەرزی ئەم دوو ئیدارەیە هێشتا تەواو نەبووە، بڕی قەرزەکانیان لە ناو کۆی گشتیی ئامارەکاندا هەژمار نەکراوە.