وەزارەتی کارەبای هەرێمی کوردستان، بە ئامانجی کەمکردنەوەی باری دارایی هاوبەشان و پاکتاوکردنی قەرزە کەڵەکەبووەکانی پێش پڕۆژەی ڕووناکی، بڕیارێکی تایبەتی بۆ داشکاندنی قەرزەکان بە ڕێژەی تاوەکو 50٪ دەرکرد، کە لە سەرەتای مانگی ئابی داهاتووەوە دەستپێدەکات و ماوەی 38 ڕۆژ بەردەوام دەبێت، ئەمەش وەک هەنگاوێک بۆ ڕێکخستنەوەی کەرتی وزە.

وادەی جێبەجێکردنی داشکاندنەکە

وەزارەتی کارەبا لەبارەی داشکاندنی قەرزە کۆنەکانەوە ڕایگەیاند، داشکاندنێکی یەکجارە بە ڕێژەی تاوەکو 50٪ بۆ قەرزی کۆنی پێش ڕووناکی ڕادەگەیەنێت، کە لەنێوان 3ـی ئاب بۆ 10ـی ئەیلوولی 2026 جێبەجێ دەکرێت. بۆ سوودمەندبوون لەم داشکاندنە، هاوبەشان پێویستە بەیەکجار تەواوی بڕی داشکێندراوی قەرزی کۆنی پێش ڕووناکی بدەن.

سنووری جێبەجێکردنی بڕیارەکە

وەزارەتی کارەبای هەرێمی کوردستان سەبارەت بە جۆری قەرزەکان ڕایدەگەیەنێت، داشکاندنەکە تەنیا قەرزی کۆنی پێش ڕووناکی دەگرێتەوە و پارەی پسووڵەکانی ڕووناکی ناگرێتەوە.

ڕاگرتنی کاتیی سیستەمی پارەدان

وەک بەشێک لە ئامادەکارییە تەکنیکییەکان بۆ جێبەجێکردنی ئەم داشکاندنە، پارەدانی کارەبا لەڕێگەی ئی-پسووڵە و هۆبەکانی فرۆشیاری وزە بۆ ماوەیەکی کاتی بەردەست نابن لەنێوان 30ـی تەمموز بۆ 3ـی ئاب.

داواکارییەک لە هاوبەشانی کارەبا

وەزارەتی کارەبا لەبارەی وادەی پارەدانی پسووڵەکانەوە داوا لە هاوبەشان دەکات، پارەی پسووڵەکانی ڕووناکی پێش 30ـی تەمموز بدەن، بەر لەوەی خزمەتگوزاریی پارەدان بۆ ماوەیەکی کاتی بووەستێت، ئەمەش بۆ لەبەرچاوگرتنی ماوەی پارەدانی 50 ڕۆژی کارەبایە کە دەبێتە هۆی دادپەروەری لە پڕۆسەی پارەدان لەنێوان هاوبەشاندا.

ڕێژەی داشکاندن بۆ پۆلە جیاوازەکان

هەر لە ڕاگەیەنراوەکەی وەزارەتی کارەبادا لەبارەی پۆلێنکردنی داشکاندنەکانەوە هاتووە، 50٪ بۆ هەموو هاوبەشانی ماڵان و کشتوکاڵی و 25٪ بۆ هەموو هاوبەشانی پیشەسازی، بازرگانی و میری، جگە لەو هاوبەشانەی کە فیدەری تایبەت بەخۆیان هەیە، داشکاندنیان بۆ دەکرێت.

شێوازی پارەدان و هۆشداری بە هاوبەشان

وەزارەتی کارەبا سەبارەت بە ڕێکارەکانی وەرگرتنی پارە ڕایدەگەیەنێت، خێراترین ڕێگە بۆ پارەدان بریتییە لە ئی-پسووڵە، بۆ ئەوەی خەڵک لە قەرەباڵغیی هۆبەکانی فرۆشیاری وزە دووربکەونەوە. هەروەها جەخت دەکاتەوە کە هەر کەسێک دەیەوێت سوودمەند بێت، نابێت پارە بداتە کارمەندانی کۆکەرەوەی پارەی پسووڵەی کارەبا، چونکە ئەوان ڕێپێدراو نین ئەو پارەیە وەربگرن.

کۆتاییهێنان بە قەرزە کەڵەکەبووەکان

وەزارەتی کارەبا لەگەڵ نزیکبوونەوە لە تەواوبوونی پڕۆژەی ڕووناکی و کۆتاییهێنان بە قەرزە کۆنەکانی پێش ڕووناکی ڕایدەگەیەنێت، هاوبەشان پێویستە پابەند بن بە دانەوەی ئەم قەرزانە، چونکە بۆ هەندێک هاوبەش کەڵەکەبوونی قەرزی کۆن لەسەریەک وای کردووە دانەوەیان زەحمەتتر بێت.

ئامانجی ئاسانکارییە نوێیەکان

وەزارەتی کارەبا سەبارەت بە پاڵنەرەکانی ئەم بڕیارە ڕایدەگەیەنێت، هەر بەم هۆکارەش، وەزارەت ئەم ئاسانکارییە دەکات تاوەکو لەڕێگەی ئەم داشکاندنە یەکجارەکییە، یارمەتیی هاوبەشان بدات بتوانن قەرزی کۆنی پێش ڕووناکی بدەنەوە.

چەسپاندنی دادپەروەری لە وەرگرتنی پارەی کارەبا

وەزارەتی کارەبا لەبارەی قۆناغی نوێی پێدانی کارەبا ڕایدەگەیەنێت، لەم قۆناغەدا پێویستە پارەی پسووڵەکان لە کاتی خۆیدا بدرێن، ئەمەش لەڕێگەی میکانیزمی 50 ڕۆژی پارەدانی پسووڵەی کارەبا کە وادەکات دادپەروەری بۆ هەمووان دابین بکرێت.

پەیوەندیکردن بە سەنتەری خزمەتگوزاری

وەزارەتی کارەبا لە کۆتایی ڕاگەیەنراوەکەدا سەبارەت بە وەڵامدانەوەی پرسیاری هاوبەشان ڕایگەیاند، هەر پرسیارێک هەبوو هاوبەشان دەتوانن تەلەفۆن بکەن بۆ سەنتەری خزمەتگوزاریی ڕووناکی لەڕێگەی ژمارە 1992.