حکومەتی هەرێمی کوردستان ماوەی 38 ڕۆژی بۆ هاوبەشانی کارەبا دیاریکردووە تاوەکو قەرزە کەڵەکەبووەکانیان بدەنەوە، لە بەرامبەردا داشکاندن لە بڕی قەرزەکاندا دەکرێت.

وادەی دانەوەی قەرزەکان و شێوازی پارەدان

وەزارەتی کارەبا لە 3ـی ئاب تاوەکو 10ـی ئەیلوولی ئەمساڵ (بۆ ماوەی 38 ڕۆژ) وەک وادەی کۆتایی بۆ دانەوەی قەرزە کۆنەکانی کارەبا دیاریکردووە. پێویستە هاوبەشان بڕی قەرزەکە بە یەک گوژمە و تەنیا لە ڕێگەی "ئی-پسووڵە" یان بەشی فرۆشتنی وزەی فەرمانگەکانی کارەبا بدەنەوە. هۆشداریش دەدرێت کە نابێت پارەی قەرزەکە بدرێتە ئەو فەرمانبەرانەی پسووڵە بۆ ماڵان دەبەنەوە، چونکە ئەوان دەسەڵاتی جێبەجێکردنی داشکاندنیان نییە.

ڕێژەی داشکاندن بۆ جۆرە جیاوازەکانی هاوبەشان

بەپێی ڕێنماییە نوێیەکان، داشکاندنەکان بەم شێوەیە پۆلێن کراون:

هاوبەشانی ماڵان و کشتوکاڵی: 50% داشکاندن بۆ کۆی قەرزەکان دەکرێت.

هاوبەشانی پیشەسازی، بازرگانی و میری: 25% داشکاندن بۆ کۆی قەرزەکانیان دەکرێت.

ئاماری قەرزە کەڵەکەبووەکان

سەرچاوەیەک لە پڕۆژەی ڕووناکی ئاشکرای کرد، کۆی گشتیی قەرزی کەڵەکەبووی کارەبا لە هەرێمی کوردستان زیاتر لە 2 تریلیۆن دینارە. بەپێی داتاکان، 75%ـی هاوبەشان قەرزیان لایە، بەڵام جێگەی سەرنجە کە 80%ـی کۆی قەرزە کۆنەکانی پێش پڕۆژەی ڕووناکی تەنیا لای 25%ـی هاوبەشانە، ئەمەش ئەوە دەردەخات کە ژمارەیەکی کەم لە هاوبەشان زۆرترین قەرزداری حکومەتن.

ژمارەی گشتیی هاوبەشانی کارەبا

بەگوێرەی دوایین ئامارەکانی پڕۆژەی ڕووناکی، لە هەرێمی کوردستان 1,950,000 هاوبەشی کارەبا هەیە. ئەم ژمارەیە سەرجەم سێکتەرەکانی وەک ماڵان، میری، پیشەسازی، بازرگانی و پیشەوەران لەخۆ دەگرێت، کە زۆرینەیان هاوبەشانی ماڵانن و پشکی شێری قەرزەکانیان (نزیکەی 1 تریلیۆن دینار) لەسەرە.