ئەمڕۆ حکومەتی هەرێمی کوردستان کۆبوونەوەی هەفتانەی خۆی ئەنجام دەدات بۆ دۆزینەوەی چارەسەر بۆ قەیرانی سووتەمەنی و ئامادەکردنی داواکارییە داراییەکانی هەرێم بۆ یاسای بودجەی ساڵی 2027ـی عێراق.

تاوتوێکردنی قەیرانی سووتەمەنی و گرانیی بەنزین

تەوەری سەرەکیی کۆبوونەوەی ئەمڕۆی ئەنجوومەنی وەزیران، پرسی سووتەمەنی و ئەو قەیرانەیە کە لە ماوەی ڕابردوودا بەهۆی گرانبوونی نرخی بەنزین لە بازاڕەکاندا دروستبووە. حکومەت کارنامەی یەکەمی بۆ ئەم پرسە تەرخان کردووە تاوەکو ڕێگەیەک بۆ کەمکردنەوەی بارگرانی سەر شانی شۆفێران بدۆزێتەوە.

هەوڵ بۆ بەدەستهێنانی بەنزینی پاڵپشتیکراوی بەغدا

پێشتر ئامانج ڕەحیم، سکرتێری ئەنجوومەنی وەزیرانی هەرێمی کوردستان لەمیانی بەشدارییکردنی لە بوڵتەنی 12ـی کەناڵ8 ڕایگەیاند کە لە کۆبوونەوەکەدا باس لەوە دەکرێت چۆن هەرێمی کوردستان سوودمەند بێت لەو بەنزینەی کە حکومەتی فیدراڵ بە نرخی پاڵپشتیکراو (450 دینار بۆ هەر لیترێک) دابەشی دەکات. ئامانج ڕەحیم جەختی کردەوە کە بەهۆی ئەوەی هەرێم هیچ بودجەیەکی دیکەی نییە جگە لە مووچە، ناتوانێت خۆی پاڵپشتیی نرخی سووتەمەنی بکات، بۆیە داوا دەکرێت بەغدا بە یەکسانی مامەڵە لەگەڵ شۆفێرانی هەرێم بکات.

ئامادەکاری بۆ بودجەی 2027ـی عێراق

تەوەرێکی دیکەی کۆبوونەوەی ئەنجوومەنی وەزیران تایبەت دەبێت بە خستنەڕووی پێشنیازەکانی وەزیری دارایی و ئابووری سەبارەت بە بودجەی ساڵی 2027ـی عێراق. لەم بەشەدا باس لە پێویستییە داراییەکانی هەرێم و شایستەکان دەکرێت بۆ ئەوەی ڕەوانەی بەغدا بکرێن و لە یاسای بودجەی ساڵی داهاتوودا جێگیر بکرێن، تاوەکو هەرێم بتوانێت پشکی شایستەی خۆی لە بودجەی وەبەرهێنان و خەرجییە گشتییەکان وەربگرێت.

ڕێگریکردن لە قۆرخکاری و چاودێریی بازاڕ

پێشبینی دەکرێت لە کۆبوونەوەکەدا باس لە چالاککردنی لیژنەکانی چاودێریی بازاڕ بکرێت بۆ ڕێگریکردن لە قۆرخکاری لە کەرتی سووتەمەنیدا. حکومەت دەیەوێت لە ڕێگەی وەزارەتی سامانە سرووشتییەکانەوە فشار لەسەر بازرگانان دروست بکات تاوەکو پابەندی ئەو نرخە بن کە دیاری دەکرێت و کۆتایی بەو قەیرانە بهێنرێت کە ماوەیەکە لە شارەکانی هەرێمی کوردستان بەردەوامە.