موقتەدا سەدر، ڕێبەری ڕەوتی نیشتمانیی شیعە، خاکی عێراق بە "پیرۆز" ناودەبات و دەڵێت "ئەگەر لەم زەوییە پیرۆزەوە بۆردوومانی کۆماری ئیسلامی ئێران نەکرابێت ئەوا پێویستە لەسەر برایانی سوپای پاسدارانی ئێران بۆردوومانی خاکە سەربەخۆ پیرۆزەکەمان نەکەن".

پەیامێک لەبارەی هێرشەکانی سەر حەشدی شەعبی

موقتەدا سەدر، لەبارەی هێرشەکانی بەرەبەیانی ئەمڕۆ بۆ سەر چەند بارەگایەکی حەشدی شەعبی پەیامێکی بڵاوکردەوە و تێیدا ئاماژەی بەوە کرد، پێویستە هەمووان بە ڕۆحی برایەتی و ئاشتی مامەڵە بکەن و نەبنە داردەستی جێبەجێکردنی پلانە دوژمنکارییەکانی ئەمریکا و ئیسرائیل بۆ ڕاکێشانی براکان بۆ کوشتنی یەکدی.

سەرکۆنەکردنی بەئامانجگرتنی عێراق و ڕەفتاری میلیشیاکان

موقتەدا سەدر، ڕێبەری ڕەوتی نیشتمانیی شیعە لەبارەی بەئامانجگرتنی سەروەریی وڵاتەوە ڕایگەیاند، من لە کاتێکدا سەرکۆنەی بەئامانجگرتنی خاکی پیرۆزی عێراق دەکەم لەلایەن هەر دەوڵەت و لایەنێک لە هەمان کاتدا سەرکۆنەی کاری میلیشیا بێشەرمەکان دەکەم بۆ تێوەگلانی عێراق لە جەنگ و کوشتن.

داواکاری لە حکومەت بۆ پاراستنی ئاسایش

سەدر داوا لە حکومەتی عێراق دەکات ئاسایش بپارێزێت و بە جددی کار بکات لەپێناوی ئاشتی گەلی عێراق و پیرۆزییەکانی.

هۆشداریدان لە شانە نووستووەکان و ئاڵۆزکردنی دۆخەکە

موقتەدا سەدر، ڕێبەری ڕەوتی نیشتمانیی شیعە لەبارەی ئاشتیی کۆمەڵایەتی و مەترسیی تائیفییەتەوە ڕایگەیاند، عێراق و گەلەکەی پێویستیان بە ئاشتی هەیە و داواش دەکات بە وریاییەوە مامەڵە لەگەڵ شانە نووستووەکان لە ناوخۆ و دەرەوە بکرێت کە تائیفییەت وەک بەهانەیەک بۆ تێکدانی ئاسایشی عێراق بەکاردەهێنێت.