قەتەر بە توندی سەرکۆنەی ئەو هێرشانە دەکات کە کراونەتە سەر دامەزراوە نەوتییەکانی شانشینی عەرەبیی سعودیە، هاوکات ڕایگەیاند کە بە تەواوەتی پاڵپشتی لە ڕێکارەکانی ئەو وڵاتە دەکات بۆ پاراستنی سەلامەتی و سەروەریی خاکەکەی.

پێشێلکردنی یاسا نێودەوڵەتییەکان

وەزارەتی دەرەوەی قەتەر لەبارەی هێرشەکانی سەر سعودیە ڕایگەیاند، سەرکۆنەی ئەو هێرشانە دەکەن کە لە خاکی عێراقەوە کرانە سەر سعودیە، ئەو کردەوەیە پێشێلکردنی تەواوەتیی سەروەریی سعودیە و یاسا نێودەوڵەتییەکان و پەیماننامەکانی نەتەوە یەکگرتووەکانە.

پاڵپشتیکردنی ڕێکارەکانی سعودیە

وەزارەتی دەرەوەی قەتەر لەبارەی پشتگیریکردنی ریازەوە دەڵێت، پشتگیریی خۆی بۆ سعودیە دووپات دەکاتەوە و پاڵپشتیی سەرجەم ئەو ڕێکارانەش دەکات کە سعودیە بۆ پارێزگاری لە سەروەری و سەلامەتیی خاکەکەی دەیگرێتەبەر.

ئاڵۆزییە هەرێمییەکان و وەڵامی سەربازی

ڕاگەیەندراوەکەی قەتەر لە کاتێکدایە دوێنێ سعودیە ڕایگەیاند، لە خاکی عێراقەوە هێرشیان کراوەتەسەر، بەرەبەیانیی ئەمڕۆ بە هاوبەشی لەگەڵ ئەمریکا ژمارەیەک لە بنکەکانی حەشدی شەعبی لە عێراق بۆردوومان کرد.