باج و گومرگ لەسەر سیستمەکانى وزەى خۆر هەڵدەگیرێت
ئەنجوومەنی نوێنەرانی عێراق پێشنیازەیاسای لێخۆشبوونی سیستمەکانی وزەی خۆری لە باج و گومرگ ڕەوانەی لیژنە تایبەتمەندەکان کرد بە مەبەستی تەواوکردنی ڕێکارە یاساییەکان و پەسەندکردنی، کە لێخۆشبوونی 100% بۆ كەرەستەكان و دابینکردنی قەرزی ئاسان بۆ هاووڵاتییان لەخۆدەگرێت تاوەکو بارگرانیی سەر تۆڕی کارەبای نیشتمانی و مۆلیدەکان کەمبکرێتەوە.
ڕێژەی لێخۆشبوون لە باج و گومرگ
محەمەد هادی شەمەری، پەرلەمانتار لەبارەی ناوەڕۆکی پێشنیازەیاساکەوە ڕایگەیاند، پێشنیازەیاساکە لێخۆشبوونی 100% بۆ پەنێڵ، باتری و ئینڤێرتەر لەخۆدەگرێت، ئەمەش بە مەبەستی دابەزاندنی نرخەکانیان لە بازاڕدا.
دابینکردنی قەرز و کەمکردنەوەی بارگرانی
پێشنیازەکە بانکی ناوەندی و بانکەکان ڕادەسپێرێت بۆ پێدانی قەرزی ئاسان بە سوودی پاڵپشتیکراو یان بەبێ سوود و بە سیستمێکی قیستی گونجاو، ئەمەش بۆ کەمکردنەوەی بارگرانیی سەرشانی هاووڵاتییان و کەمکردنەوەی پشتبەستن بە مۆلیدە ئەهلییەکان و تۆڕی کارەبای نیشتمانی، جگە لە کەمکردنەوەی تێچووی هاوردەکردنی سووتەمەنی بۆ وێستگەکانی بەرهەمهێنانی کارەبا.
زۆربوونی خواست لەسەر وزەی خۆر
بەهۆی بەرزبوونەوەی نرخی سووتەمەنی و وزە تاوەکو دێت خواست لەسەر بەکارهێنانی سیستمی وزەی خۆر لەلایەن هاووڵاتییانی عێراق و هەرێمی کوردستان ڕوو لە زیادبوونە، سیستمەکە بە تیشکی خۆر کار دەکات کە سەرچاوەیەکی سروشتییە و هەموو ڕۆژێک خۆی نوێ دەکاتەوە، جیاواز لە نەوت و گاز، مەترسیی کەمبوونەوەی بڕەکەی نییە.
2 کاتژمێر پێش ئێستا