لە تورکیا ئاگر لە دارستانەکانی هەریەک لە ئەنتاڵیا، موغڵا، یاڵۆڤا، کوتاهیا، چاناککەلە و باڵکئەسیر کەوتووەتەوە، لە ڕێگەی ئاسمانی و وشکانییەوە هەوڵی کۆنترۆڵکردنی دەدرێت.

لە ڕێگەی ئاسمان و وشکانییەوە هەوڵی کۆنترۆڵکردنی دەدرێت

ئەو ئاگرەی دوێنێ لە دارستانەکانی ناوچەی کاشی ئەنتاڵیا کەوتەوە، لە ڕێگەی ئاسمانی و وشکانییەوە هەوڵی کۆنترۆڵکردنی دەدرێت.

پێکهاتە تیمە زەمینییەکان بۆ کۆنترۆڵکردنی ئاگرەکە

لە ڕێگەی 26 ئۆتۆمبێلی گەورەی ئاگرکوژێنەوە، نۆ تانکەر، پێنج ئۆتۆمبێلی فریاکەوتن و 155 کارمەندی تەکنیکی و کارمەندی ئاگرکوژێنەوەوە کارەکانی کۆنترۆڵکردنی ئاگرەکە بەردەوامە. هەر لە بەیانیشەوە هێلیکۆپتەر و فڕۆکەکان لە ئاسمانەوە دەستیان بە پشتیوانیکردنی هەوڵەکان کرد.

هاوکات هەوڵەکان لە ئاسمان و زەوییەوە، بۆ کوژاندنەوەی ئەو ئاگرەی لە دارستانەکانی ناوچەی سەیدیکەمەری موغڵا کەوتبووەوە بەردەوامە.

پێکهاتە تیمە ئاسمانییەکان بۆ کۆنترۆڵکردنی ئاگرەکە

پارێزگاری موغڵا ڕایگەیاند، کۆی گشتی 23 ئامێری ئاسمانی کە پێنج فڕۆکە و 18  هێلیکۆپتەرن، لەگەڵ 93 ئۆتۆمبێلی گەورەی ئاگرکوژێنەوە، سێ ئۆتۆمبێلی فریاکەوتن، 24 تانکەری ئاو، هەشت ئەمبوڵانس و 835 کارمەند ئەرکدار کراون.

دەربازکردنی دانیشتوان

ئاماژە بەوەشکراوە، 121 ماڵ چۆڵکراون و دانیشتووانیان دەربازکراون.

 ڕیگەی هاتووچۆی ناوچەیەک داخراوە

میدیای تورکیا بڵاویکردەوە، بەهۆی ئاگر و دووکەڵی چڕەوە، ڕێگەی وشکانیی نێوان ئەنتاڵیا-سەیدیکەمەر و فەتحییە-ئەنتاڵیا بەڕووی هاتووچۆدا داخراوە.

توانایەکی فراوانی مرۆیی و تەکنیکی بۆ کۆنترۆڵکردنی ئاگرەکە

هاوکات ئیسماعیل ئوستائۆغڵو، پارێزگاری باڵکئەسیر ڕایگەیاند، بە شەش فڕۆکە، پێنج هێلیکۆپتەر، 35 ئۆتۆمبێلی ئاگرکوژێنەوە، 19 تانکەری ئاو و حەوت ئۆتۆمبێلی فریاکەوتن و 320 کارمەندەوە هەوڵی کۆنترۆڵکردنی ئاگرەکانی پارێزگای باڵکئەسیر دەدرێت.

هاوکات 210 ناوچەی نیشتەجێبوون لە پارێزگاکە وەک ڕێکارێکی خۆپارێزیی چۆڵکراون.

هاوکات ئاگری دارستانەکانی هەریەک لە پارێزگاکانی کوتاهیا، یاڵۆڤا و چاناککالە هێشتا بەردەوامە و کۆنترۆڵ نەکراون.