لە ئۆپراسیۆنێکی هاوبەشی نێوان بەڕێوەبەرایەتیی گشتیی کاروباری ماددە هۆشبەرەکانی عێراق و دەزگای ئاسایشی هەرێمی کوردستان لە سلێمانی، باندێکی نێودەوڵەتیی بازرگانیکردن بە ماددەی هۆشبەر دەستگیر کران و لە دەروازەی سنووریی عەرعەر دەست بەسەر 38 کیلۆگرام کریستاڵدا گیرا، کە باندەکە دەیانویست عێراق وەک ڕێڕەوێک بۆ گواستنەوەی ماددەکان بەرەو وڵاتانی دراوسێ بەکاربهێنن.

هەماهەنگیی نێوان بەغداد و ئاسایشی سلێمانی

عەباس بەهادلی، گوتەبێژی بەڕێوەبەرایەتیی ماددە هۆشبەرەکان لەبارەی ئۆپراسیۆنە هەواڵگرییەکەوە بە ئاژانسی هەواڵی عێراقی ڕایگەیاند، لە ئۆپراسیۆنێکی هەواڵگریدا بەڕێوەبەرایەتیی گشتیی کاروباری ماددە هۆشبەرەکان، بە هەماهەنگی و هاوکاری لەگەڵ دەزگای ئاسایشی هەرێمی کوردستان لە پارێزگای سلێمانی، توانییان گورزێکی کوشندە لە باندەکانی بازرگانیکردنی نێودەوڵەتیی ماددەی هۆشبەر بوەشێنن.

بڕی ماددە دەستبەسەرداگیراوەکان و دەستگیرکراوان

گوتەبێژی بەڕێوەبەرایەتییەکە لەبارەی چالاکییەکە و دەستگیرکراوەکانەوە ئاماژەی بەوەش کرد، لە چالاکییەکەدا دەست بەسەر 38 کیلۆگرام لە ماددەی هۆشبەری کریستاڵدا گیرا و ئەندامانی باندە نێودەوڵەتییەکەش کە لە بواری قاچاخچێتی و بڵاوکردنەوەی ماددە هۆشبەرەکاندا چالاک بوون، دەستگیر کران.

عێراق وەک ڕێڕەوی تێپەڕاندنی ماددە هۆشبەرەکان

گوتەبێژی بەڕێوەبەرایەتیی ماددە هۆشبەرەکان لەبارەی ئامانجی باندەکەوە ڕوونیکردەوە، ئەم باندە خاکی عێراقیان وەک ڕێڕەوێک بۆ تێپەڕاندنی ماددە هۆشبەرەکان بەرەو یەکێک لە وڵاتانی دراوسێ بەکارهێناوە.

سەرکەوتنی هەوڵە هەواڵگری و مەیدانییەکان

ناوبراو لەبارەی وردەکاریی پرۆسەکەوە جەختیشی لەسەر ئەوە کردەوە، ئەم پرۆسەیە دوای هەوڵێکی وردی هەواڵگری و بەدواداچوونی مەیدانیی چڕ هات، کە تێیدا مەفرەزەکان توانییان جووڵەکانی باندەکە بخەنە ژێر چاودێری و دەستگیریان بکەن.

شاردنەوەی ماددەکان لەناو تانکیی سووتەمەنیدا

گوتەبێژی بەڕێوەبەرایەتییەکە لەبارەی شوێنی شاردنەوەی ماددە هۆشبەرەکان دەشڵێت، ئەو ماددە هۆشبەرانەی ئامادەکرابوون بۆ ئەوەی لە ڕێگەی دەروازەی سنووریی عەرعەرەوە بۆ وڵاتێکی دراوسێ بە قاچاخ ببرێن، پێش گەیشتن بە شوێنی مەبەست دەستیان بەسەردا گیرا، کە لەناو تانکیی سووتەمەنیی یەکێک لە ئۆتۆمبێلەکانی باندەکەدا شاردرابوونەوە.