ئەمریکا و ئێران و عومان نزیکن لە گەیشتنە بە ڕێککەوتن بۆ کردنەوەی گەرووی هوورمز
پووختەی هەواڵەکە:
- واشنتن، تاران و مەسقەت گەیشتنە ڕێککەوتنێکی کاتی 60 ڕۆژە بۆ کردنەوەی گەرووی هوورمز.
- بەپێی ڕێککەوتنەکە، ئێران دەسەڵاتی زیاتری لە گەرووەکەدا دەبێت و هیچ باجێک لە کەشتییەکان وەرناگیرێت.
- دوای پاککردنەوەی گەرووەکە لە مین، دانوستان بۆ ڕێککەوتنی ئەتۆمی و ئاگربەستی هەمیشەیی دەستپێدەکات.
- ڕێبەری باڵای ئێران ڕەزامەندی لەسەر ڕێککەوتنەکە داوە و پێشبینی دەکرێت ڕۆژی چوارشەممە ڕابگەیەنرێت.
ماڵپەڕی ئەکسيۆسی ئەمريکی بڵاویکردۆتەوە ئەمریکا و ئێران و عومان گەیشتوونەتە لێکتێگەیشتنێکی مێژوویی بۆ کردنەوەی گەرووی هوورمز و کۆتاییهێنان بەو قەیرانەی جیهانی تووشی شۆک کردبوو. ئەم ڕێککەوتنە نەک تەنیا ڕێڕەوەکانی کەشتیوانی ڕێکدەخاتەوە، بەڵکو دەسەڵاتێکی بێ وێنەش بە تاران دەبەخشێت و دەرگای دانوستانە ئەتۆمییەکانیش واڵا دەکات.
وردەکارییەکانی ڕێککەوتنەکە و هەڵوێستی ئەمریکا:
- ڕێککەوتنەکە بۆ ماوەی 60 ڕۆژە و ئەگەری درێژکردنەوەی هەیە، کە ئامانج لێی گەڕانەوەی ئاگربەست و دەستپێکردنەوەی دانوستانە ئەتۆمییەکانە.
- هەموو هاتووچۆی کەشتییەکان بۆ ناو کەنداو لە هێڵی باکوور (سنووری ئێران) و بۆ دەرەوە لە هێڵی باشوور (سنووری عومان) دەبێت.
- لە ماوەی 60 ڕۆژدا هیچ باجێک یان بڕە پارەیەک لەو کەشتییانە وەرناگیرێت کە بە گەرووەکەدا تێپەڕ دەبن.
- لایەنەکان کار دەکەن بۆ پاککردنەوەی هێڵی ناوەندی گەرووەکە لە مین لە ماوەی 30 ڕۆژدا.
- دوای پاککردنەوەی مینەکان، ڕێکخستنێکی هەمیشەیی بۆ جووڵەی کەشتییەکان لە نێوان عومان و ئێران واژۆ دەکرێت.
- لە ڕێککەوتنە نوێیەکەدا، ئێران خاوەنی دەسەڵاتێکی زیاتر دەبێت لە گەرووی هوورمز بەراورد بە پێش دەستپێکردنی جەنگ.
هەڵوێستی ئێران و ڕۆڵی نێوەندگیرە نێودەوڵەتییەکان:
ماڵپەڕی ئەکسیۆس ئاشکرای کردووە کە عەباس عێراقچی، وەزیری دەرەوەی ئێران، دوای وەرگرتنی ڕەزامەندیی موجتەبا خامنەیی، ڕێبەری باڵا، وەڵامی ئەرێنیی بە ئەمریکا داوەتەوە. ئەم لێکتێگەیشتنە دوای زنجیرەیەک پەیوەندیی تەلەفۆنیی نێوان دۆناڵد ترەمپ، ستیڤ ویتکۆف و بەرپرسانی ئێرانی و عومانی هاتە ئاراوە. هاوکات وڵاتانی قەتەر، پاکستان و سعودیە ڕۆڵی گرنگیان لە نێوەندگیری و هێورکردنەوەی دۆخەکەدا بینیوە تاوەکو ڕێککەوتنەکە بگاتە قۆناغی کۆتایی و ڕۆژی چوارشەممە بە فەرمی ڕابگەیەنرێت.
زانیاری زیاتر بۆ تۆ
2 کاتژمێر پێش ئێستا