وەزیری نەوت: بەرهەمهێنانى نەوت لە چوار کێڵگەی کەرکووک زیاددەکرێت

پوختەى هەواڵەکە

وەزیرى نەوتى عێراق، سەرپەرشتى چوارەمین کۆبوونەوەی پرۆژەى پەرەپێدانی چوار کێڵگەی نەوتی لە کەرکووک کرد.
کێڵگەکان پێکدێن لە "بای حەسەن، جەمبور، خەباز، ئاڤانا و بابا".
لەلایەن کۆمپانیای بی پی بەریتانییەوە کاریان تێدا دەکرێت.

بەگوێرەى ئەو زانیارییەى گەیشتووە بە کەناڵ8، ئەمڕۆ پێنجشەممە، باسم محەممەد خزەیر، وەزیرى نەوتى عێراق گەیشتە شارى کەرکووک و لە کۆبوونەوەیەکدا، جەختی لە زیادکردن و بەردەوامبوونی بەرهەمهێنان و وەبەرهێنانى نەوتی خاو و گاز کردووەتەوە.

خزمەتگوزارییەکانى پڕۆژەکە بۆ هاوڵاتییان

وەزیرى نەوت: گرنگى پێشکەشکردنی خزمەتگوزاری بە دانیشتووانی ناوچەکانی دەوروبەری کێڵگەکانی پارێزگای کەرکووک کرد لە ڕێگەی سوودە کۆمەڵایەتییەکانی پڕۆژەکەوە.
خزەیر، بە پێویستی زانیوە دامەزراندنی کرێکارانی ناوخۆیی لە پارێزگاکە کارى لە پێشینە بێت.
لە هەر چوار کێڵگەکەشدا بۆ پەرەپێدان سوود لە تەکنەلۆجیای مۆدێرن و نوێترین تەکنیکەکان وەربگیرێت.

پارێزگای کەرکووک خاوەنی یەکێک لە کۆنترین و گەورەترین پێکهاتە نەوتییەکانی جیھانە کە مێژووی دۆزینەوەی دەگەڕێتەوە بۆ ساڵی 1927 لە ناوچەی بابا گوڕگوڕ. ئێستا ئاستی بەرهەمهێنانی گشتی ئەم کێڵگانە لە ژێر سەرپەرشتی کۆمپانیای نەوتی باکوور نزیکەی 320 هەزار بەرمیل نەوتە لە ڕۆژێکدا.

کێڵگە نەوتییە سەرەکییەکانی کەرکوک

کێڵگەی کەرکوک (قوبەی بابا و ئاڤانە): گەورەترین پێکهاتەی نەوتی ناوچەکەیە. قوبەی بابا (بابا گوڕگوڕ) شوێنی سەرەتایی دۆزینەوەی نەوتەکەیە و قوبەی ئاڤانە بەشێکی گرنگی ستراتیژیی کێڵگەکەیە.
کێڵگەی بای حەسەن: دەکەوێتە باکووری ڕۆژئاوای کێڵگەی سەرەکی کەرکوک و یەکێکە لە کێڵگە هەرە دەوڵەمەندەکان بە نەوتی خاو.
کێڵگەی جەمبوور (چەمەبۆر): دەکەوێتە باشووری ڕۆژهەڵاتی شاری کەرکوک و جگە لە نەوت، خاوەنی یەدەگێکی باشی غازی سروشتیشە.
کێڵگەی خەباز: کێڵگەیەکی تری چالاکە لە ڕۆژئاوای کەرکوک کە پشکی گرنگی هەیە لە دابینکردنی سووتەمەنی ناوخۆیی.