پوختەی هەواڵ:

• ئارینا سابالینکا و ئەلکسەندەر زڤێرێڤ بە شێوەیەکی چاوەڕواننەکراو لە جامی سێنسیناتی دەرکران.
• سارا بێلێکی چیکی گەورەترین سوپڕایزی خولەکە بوو و توانی شکست بە سابالینکای یەکەمی ڕیزبەندیی جیهان بهێنێت.
• تۆمی پۆڵی ئەمریکی دوای ڕاگرتنی یارییەکە بەهۆی بارانبارینەوە، زڤێرێڤی تووشی شکست کرد.
• ئەستێرەکانی وەک ئیگا شڤیۆنتێک، کۆکۆ گۆف، تایلۆر فریتز و لۆرێنزۆ موسێتی بەبێ ئەوەی دووچاری ئاستەنگی ببنەوە، پەڕینەوە بۆ قۆناغی چارەکی کۆتایی.

ململانێکانی قۆناغی 16ی جامی سێنسیناتی ماستەرز بۆ تێنسی سەرزەوی، لە کەشوهەوایەکی باراناویدا گۆڕانکاریی گەورەی بەخۆیەوە بینی و چەندین ئەستێرەی گەورە و بەناوبانگ بە شێوەیەکی چاوەڕواننەکراو ماڵئاواییان کرد و بەشێکیش لە گەورەکان خۆیان گەیاندە قۆناغی چارەکی کۆتایی.

کێبڕکێی خانمان

سارا بێلێکی چیکی، خاوەنی پلەی 35ی جیهان، بەهێزترین شۆکی لە پاڵەوانێتییەکەدا دروست کرد دوای ئەوەی بە ئەنجامی 7 - 6 و 6 - 4 سەرکەوتنێکی مێژوویی بەسەر ئاریۆنا سابالینکای یەکەمی جیهاندا دەستەبەر کرد.

بێلێک دوای یارییەکە ڕایگەیاند کە یەکەم سەرکەوتنی بەرامبەر 11 یاریزانە پێشەنگەکەی جیهان بە ئیرادەیەکی بەهێزەوە تۆمار کردووە.

لە لایەکی دیکەوە، ئیگا شڤیۆنتێکی پۆڵەندی کە حەوتەمی ڕیزبەندیی خانمانە، لەگەڵ کۆکۆ گۆفی ئەمریکیی چوارەمی ڕیزبەندی بەبێ ئەوەی دووچاری ئاستەنگی و ڕکابەرییەکی بەهێز ببنەوە، خۆیان گەیاندە قۆناغی چارەکی کۆتایی و پاڵەوانێتیی سێنسیناتییان بە ئاستە بەرزەکەیان ئاوەدان کردەوە.

کێبڕکێکانی پیاوان

تۆمی پۆڵی ئەمریکی سەرکەوتنێکی دەگمەنی بەرامبەر ئەلیکساندەر زڤێرێڤ بەدەست هێنا، دوای ئەوەی یارییەکەی بە ئەنجامی 2 - 1 (4 - 6، 7 - 6، 6 - 4) لە بەرژەوەندیی خۆی یەکلایی کردەوە، ئەمەش دوای ئەوەی ڕووبەڕووبوونەوەکە بۆ ماوەی 90 خولەک بەهۆی بارانبارینەوە ڕاگیرا.

هاوکات تایلۆر فریتزی ئەمریکی بە دوو کۆمەڵەی بێبەرامبەر (6 - 3، 6 - 4) کریستۆفەر ئۆکۆنێلی تێپەڕاند، لۆرێنزۆ موسێتیی ئیتاڵیش هەمان ئەنجامی بەرامبەر جواو فاریا تۆمار کرد.

لە درێژەی یارییەکاندا، فرانسیس تیافۆی بە شێوەیەکی ناوازە و چاوەڕوانکراو لە فێلیکس ئۆجێی بردەوە و براندۆن ناکاشیمای کەنەدیش پاش ڕووبەڕووبوونەوەیەکی درێژخایەن بە ئەنجامی 2 - 1ی نونو بۆرگێسی تێپەڕاند و گەیشتنی خۆیان بۆ قۆناغی داهاتوو مسۆگەر کرد.