• بەشی شەشەم گرنگی بە کارەکتەرێکی نوێ دەدات
• جۆنێ دێپ دەگەڕێتەوە بەڵام بەشێوەیەکی جیاواز
• هێشتا هەردوولا لەگفتوگۆدان و ڕێککەوتن نەکراوە

بەشی شەشەمی فیلمی چەتەکانی دەریای کاریبی گرنگی بە کارەکتەرێکی نوێ دەدات کە مارگۆت ڕۆبی ڕۆڵی تێدا دەگێڕێت، بەپێی زانیارییەکان جۆنی دێپیش بە ڕۆڵی لاوەکی دەگێڕێت.

بەپێی هەواڵێکی ماڵپەڕی دێدڵاین، جێری برۆکهایمەری بەرهەمهێنەری فیلمەکە، پشتڕاستیکردەوە کە لە ڕاستیدا جۆنی دێپ لە گفتوگۆدایە بۆ گەڕانەوە بۆ کارەکتەری کاپتن جاک سپاڕۆ.

بەشێک لە شارەزایان و بینەرانی فیلم دەڵێن، کارەکتەری جاک سپارۆی جۆنی دێپ کارەکتەری لاوەکی فیلمەکە دەبێت و کارەکتەرە نوێیەکەی مارگۆت ڕۆبی ڕۆڵی سەرەکی دەبێت.

ئەمەش بەشێک لە هەوادارانی زنجیرە فیلمەکە  و هەوادارانی ئەکتەرەکەی توڕە کردووە، چونکە ئەوان بەهۆی کارەکتەری جاک سپارۆ و جۆنی دێپەوە بینەری زنجیرە فیلمەکە بوون و دەڵێن، ئەگەر کاپتن نەبێت، چەتەکانی دەریای کاریبیش بوونی نامێنێت.

زنجیرە فیلمی چەتەکانی دەریای کاریبی لە پێنج بەش پێکهاتووە و لە ساڵی 2003 یەکەم بەشی پەخشکرا، فیلمەکە لە ژانرای ئەکشن و سەرکێشی و کۆمیدییە، بە کۆی گشتی هەر پێنج بەشەکەش توانیویەتی 4.5 ملیار دۆلار کۆبکاتەوە و ببێتە یەکێک لە باشترین زنجیرە فیلمەکانی مێژووی هۆڵیوود، جۆنی دێپ بە کارەکتەری کاپتن جاک سپارۆ ڕۆڵی سەرەکی لە زنجیرە فیلمەکە دەگێڕێت و یەکێکە لەو کارەکتەرانەی لەناو خەڵکدا خۆشەویستە بەتایبەت بەهۆی ڕۆڵگێڕانی جۆنیەوە.