• خانمێک هەوادارانی ماملێی نیگەران کردووە
• وریا ماملێ داوا دەکات هەواداران لێی خۆش ببن

لە بڵاوکراوەیەکی نوێیدا لە هەژماری تایبەتی خۆی لە تۆڕی کۆمەڵایەتیی فەیسبووک، وریا ماملێ، کوڕی ماملێی هونەرمەند، لەبارەی پێشهاتێکەوە دەنووسێت:

"بەداخەوە لە دوێنێ شەوەوە کچە لاوێکی کورد، لە ڕووی نەزانی و تەمەنی لاوییەوە، هەندێک لێدوانی داوە کە بووەتە هۆی ئازاردانی دڵی هەوادارانی هونەری کوردی و ماملێی نەمر، ئەم بابەتە لە تۆڕە کۆمەڵایەتییەکان و میدیاکاندا کاردانەوەی زۆری لێکەوتووەتەوە."

---

هەڕەشەیەکی زۆر لەو کچە کراوە، تەنانەت کار گەیشتووەتە ئەوەی پۆلیسی ئێران دەستبەسەری بکات

وریا ماملێ

---

دەشنووسێت: "پێویستە هەموومان وەک هەڵەیەکی کاتیی گەنجێکی بێ‌ئەزموون سەیری ئەم بابەتە بکەین و لەوە زیاتر گەورەی نەکەینەوە... دەبێت دڵمان گەورە بێت؛ وەک چۆن لە سەردەمی خۆیدا کۆمەڵێک بوختان و درۆیان بۆ ماملێ دروست دەکرد... بەڵام کاردانەوەی ماملێ تەنیا بزەیەکی سەر لێوان و بەردەوامبوون بوو لەسەر ڕێبازە هونەرییەکەی، دڵنیام ئەگەر ئێستاش خۆی لە ژیاندا مابا، بە هەمان ڕوانگەی بەخشندەییەوە سەیری ئەم ڕووداوەی دەکرد."

---

زیاتر گوشار نەخەنە سەر ئەو کچە و بنەماڵە بێتاوانەکەی، وەک ماملێ بە دڵێکی فرەوانەوە بیبوورن

وریا ماملێ

---

چی ڕوویداوە؟

سەیران عەرەبی بلۆگەر لە گرتە ڤیدیۆیەكیدا لە هەژماری ئینستاگرامی تایبەتی خۆی، بە شێوازێكی "گاڵتەجاڕانە" باسی لە شێوازی گۆرانیگوتنی ماملێی كردبوو و ئەمەش نیگەرانیی هەوادارانی ماملێی لێ کەوتەوە.