یادی لەدایکبوونی پێغەمبەری ئیسلام لە هەرێمی کوردستان دەکرێتەوە

پووختەی هەواڵەکە:

25ـی ئابی 2026، هاوکاتە لەگەڵ یادی لەدایکبوونی پێغەمبەری ئیسلام (د.خ) لە هەرێمی کوردستان.

ڕێوڕەسمەکان لە مزگەوت و تەکیە و شوێنە گشتییەکان بە شیرینی بەخشینەوە و مەولوودنامە دەستیانپێکردووە.

بەڕێوەبەرایەتییەکانى ئەوقاف لە هەولێر، سلێمانى و دهۆک کەرنەڤاڵ و ڕێوڕەسمی تایبەت ڕێکدەخەن.

بەرپرسانى حکومى، کەسایەتییە سیاسییەکان و مامۆستایانى ئایینى بەشدارى لە چالاکییەکاندا دەکەن.

ئەمڕۆ 25ـی ئابی 2026، شەقام و مزگەوتەکانى هەرێمى کوردستان بە ئاڵاى ڕەنگاوڕەنگ و شیرینى بەخشینەوە ڕازێندراونەتەوە بۆ یادى لەدایکبوونى پێغەمبەرى ئیسلام (د.خ). لە سەرلەبەیانییەوە کەرنەڤاڵە ئایینییەکان لە هەولێر و سلێمانى دەستیانپێکردووە و هەزاران هاونیشتمانى لە دەورى مزگەوتە گەورەکان کۆبوونەتەوە بۆ بەشدارى لە مەولوودنامە و چالاکییە جیاوازەکاندا. ئەم یادە کە هاوکاتە لەگەڵ 12ـی ڕەبیعی ئەوەل، سیما و کەشێکی ئایینی تایبەتی بە شارەکان بەخشیوە.

وردەکاریی ڕێوڕەسمەکان لە پارێزگاکان

لە سلێمانى کاتژمێر 10:00 ڕێوڕەسمی سەرەکی لە مزگەوتی گەورە بە ئامادەبوونی بریکاری وەزیری ئەوقاف دەستیپێکردووە.

تەکیەی کەسنەزانی و خانەقای سلێمانی وەک دوو ناوەندی گرنگ پێشوازی لە هاونیشتمانییان دەکەن بۆ ئەنجامدانی زیکر و نزا.

لە هەولێر کەرنەڤاڵێکی گەورەی ئایینی لە ناوەندی شار بە بەشدارییەکی بەرفراوانی جەماوەری بەڕێوەدەچێت.

لە دهۆک و لە مزگەوتی حاجی عەبدوڵا سۆفی خوانی تایبەت ئامادە کراوە و شیرینی بەسەر موسڵماناندا دابەش دەکرێت.

ئامادەکاریی فەرمی و بەڕێوەبەرایەتییەکانی ئەوقاف

بەڕێوەبەرایەتییەکانى ئەوقاف جەخت لەسەر پاراستنى کەشە ئایینییەکە دەکەنەوە؛ عەباس خدر، بەڕێوەبەری ئەوقافی سلێمانی ڕایگەیاندووە کە هەماهەنگی تەواو لەگەڵ یەکێتی زانایان کراوە بۆ ڕێکخستنی مەراسیمەکان. هاوکات نەبەز ئیسماعیل، بەڕێوەبەری ئەوقافی هەولێر داوای لە هاونیشتمانییان کردووە بەشداریی لەو کەرنەڤاڵە ئایینییەدا بکەن کە لە ناوەندی شار ڕێکخراوە. لە دهۆکیش بەڕێوەبەرایەتى گشتیی ئەوقاف و کاروبارى ئایینى ڕێوڕەسمی هاوبەشی لەگەڵ یەکێتیی زانایان ڕێکخستووە تاوەکو یادەکە بە شکۆوە بەڕێوەبچێت.

زانیاری زیاتر بۆ تۆ

یادی مەولودی پێغەمبەری ئیسلام (د.خ) لە مزگەوتی گەورەی سلێمانی