لە چوارچێوەی ستایش و خۆشەویستی و ڕێزگرتندا، شیعری کوردی، خاوەن پێگەیەکی باڵایە بۆ محەممەد پێغەمبەری ئیسلام (د.خ)، دیارترین شاعیران هۆنراوە و شیعریان بۆ گەورەیی ئەم کەسایەتییە نووسیوە.

---

لە دیارترین ئەو شاعیرانە:

• مەولانا خالیدی نەقشبەندی
• نالی
• مەحوی
• مەولەوی
• پیرەمێرد

---

حەزرەتی نالی، لە وەسفی گەورەیی، بوون و بەراوردکارییدا بۆ پێغەمبەر (د.خ)، لە شیعری (ئەی ساکینی ڕیازی مەدینەی مونەووەرە) دەنووسێت:

تەشبیهی حوسنی فائیقی، ئاخر، بە چی بکەم!

نووری سونووحی تەلعەتی سەد لەوحی ئەنوەرە

لێرەدایە کە نالی، پێگەی جوانیی پێغەمبەر دەباتە ئاستی باڵایی و لە هەموو پەیامبەرەکانی دیکە بەرزتری دادەنێت

---

لە چوارچێوەی یادی لەدایکبوونی پێغەمبەر (د.خ)، پیرەمێردی شاعیر ئاوڕێکی مێژووییانە لە سەرەتای یەکتاپەرستی دەداتەوە و ناوی کوردستان دەخاتە چوارچێوەی دێڕێکی ستایشەوە و دەنووسێت:

تۆ نەبوویتایە بە ئاگری نەمروود

نەسڵی ئیبراهیم نەدەبوو مەوجوود

ئەو ئیبراهیمەی تۆ نەوەی ئەوی

لە کوردستاندا دەرکەوت برەوی

---

لەبارەی خۆشەویستیی حەزرەتی مەولەوی بۆ پێغەمبەری ئیسلام (د.خ)، پ. حسێن حەسەن، شارەزا لە ئەدەبی مەولەوی دەڵێت، "جێگەی سەرسوڕمانە، کەسێک لە تاوەگۆز و سەرشاتە گەورە بووبێت، لە سەردەمێکی دوور لە شارستانییەت و زمانێکی وەکو عەرەبی، لەوپەڕی هەژاری و نەبوونییدا، گەیشتووە بەوپەڕی دۆخی دەوڵەمەندیی ڕۆحیی لەبارەی ئایین، خودا و پێغەمبەر."

لە کتێبی عەقیدەی مەرزیە، لە شیعری "مبحث الٲنبیاء والرسل علیهم السلام" دەنووسێت:

ئەو سەخاوەتە و ئەو فوتووەتە،

ئەو شەجاعەتە و ئەو مورووەتە

ئەو سەباتە و ئەو ئیستیقامەتە

ئەو بەقای ئاسار تا قیامەتە