ئەمریکا ستراتیژییەکی نوێی ئابووری و سەربازی دژی ئێران پەیڕەو دەکات
پووختەی هەواڵەکە:
- واشنتن بڕیاریداوە تاوەکو دوای هەڵبژاردنی نیوەخولی، خۆی لە هێرشی سەربازیی راستەوخۆ بۆ سەر ئێران بەدوور بگرێت.
- ئیدارەی ترەمپ سەرنجی سەرەکی خستووەتە سەر توندکردنەوەی گەمارۆ دەریاییەکان و خنکاندنی ئابووری تاران.
- هێزی دەریایی ئەمریکا کۆنترۆڵی گەرووی هورمزی کردووە و هەناردەی نەوتی ئێرانی گەیاندووەتە سفر.
- نوێنەرانی باڵای کۆشکی سپی بۆ کاروباری دانوستانەکان، سەردانی فەرماندەیی ناوەندیی (سێنتکۆم) دەکەن.
پێگەی هەواڵیی (ئەکسیۆس)ی ئەمریکی لە زاری بەرپرسێکی باڵای وڵاتەکەی و سەرچاوەیەکی ئاگادارەوە ئاشکرای کرد ئیدارەی دۆناڵد ترەمپ ستراتیژی خۆی بەرامبەر ئێران گۆڕیوە و لە ئێستادا بژاردەی سەربازیی دواخستووە. واشنتن پێیوایە لە ڕێگەی کۆنترۆڵکردنی تەواوی گەرووی هورمز و وشککردنی سەرچاوە داراییەکان، تاران دەخاتە دۆخێکی واوە کە ناچار بێت بە مەرجەکانی ئەمریکا بگەڕێتەوە سەر مێزی گفتوگۆ.
لایەنی ئەمریکی و ستراتیژی نوێ:
- مارکۆ روبیۆ، وەزیری دەرەوەی ئەمریکا، بە هاوپەیمانەکانی راگەیاندووە کە کار لەسەر سەپاندنی سزای دارایی قورستر دەکەن.
- واشنتن گەمارۆ دەریاییەکان بە سەرکەوتوو دەبینێت، چونکە لە ماوەی 2 هەفتەی رابردوودا هیچ تانکەرێکی نەوت لە دوورگەی خارگ نەبینراوە.
- سوپای ئەمریکا گەرووی هورمزی لە مین پاککردووەتەوە و ئێستا هاتوچۆی تانکەرەکان لە ژێر کۆنترۆڵی ئەواندایە.
- تۆمی پیگۆت، گوتەبێژی وەزارەتی دەرەوە، دووپاتی دەکاتەوە کە ئابووری ئێران لە داڕماندایە و سەرچاوە داراییەکانیان دەبڕن.
لایەنی هەرێمی و هەوڵە دیپلۆماسییەکان:
عاسم مونیر، فەرماندەی سوپای پاکستان، دوای پەیوەندییەکی تەلەفۆنی لەگەڵ دۆناڵد ترەمپ، سەردانی تارانی کردووە بۆ نێوەندگیری. لە کاتێکدا کۆشکی سپی بوونی دانوستانی فەرمی ڕەتدەکاتەوە، بەڵام ستیڤ ویتکۆف و جارید کۆشنەر وەک نوێنەرانی دانوستان، چاودێری دوایین پێشهاتە مەیدانییەکان لە (سێنتکۆم) دەکەن بۆ هەڵسەنگاندنی ئامادەیی ئێران بۆ گفتوگۆ.
زانیاری زیاتر بۆ تۆ
57 خولەک پێش ئێستا