پوختەی هەواڵ:

• مانچێستەر سیتی بە فەرمی گرێبەستی لەگەڵ ئەیووب بوعەدیی یاریزانی لاوی مەغریبی بۆ ماوەی پێنج وەرز ڕاگەیاند.
• بوعەدیی تەمەن 18 ساڵ، گرێبەستەکەی تاوەکو هاوینی 2031 لەگەڵ یانەی مانچێستەر سیتی بەردەوام دەبێت.
• ئەم یاریزانە لە هێڵی ناوەڕاستدا یاری دەکات و پێشتر 96 یاری لەگەڵ لیل و هەشت یاریی لەگەڵ هەڵبژاردەی مەغریب کردووە.
• بوعەدی درێسی ژمارە 32 دەپۆشێت و دەبێتە چوارەمین گرێبەستی هاوینەی مانچێستەر سیتی.

یانەی مانچێستەر سیتیی ئینگلیزی، بە شێوەیەکی فەرمی گواستنەوەی ئەیووب بوعەدیی یاریزانی لاوی مەغریبی لە یانەی لیلی فەرەنسییەوە ڕاگەیاند، بە گرێبەستێک کە تاوەکو هاوینی 2031 بەردەوام دەبێت.

بوعەدیی تەمەن 18 ساڵ، دوای تەواوکردنی ڕێکارەکانی گواستنەوە و بەدەستهێنانی مۆڵەتە نێودەوڵەتییەکان، دەچێتە ڕیزەکانی پاڵەوانی ئینگلتەرا.

ئەم یاریزانە، کە وەک یەکێک لە دیارترین بەهرەمەندە دەرکەوتووەکانی ئەورووپا و مەغریب ئەژمار دەکرێت، پێشتر 96 یاری لەگەڵ لیل و 8 یاریی نێودەوڵەتی لەگەڵ هەڵبژاردەی مەغریب ئەنجامداوە، بە توانای بەرزی لە کۆنترۆڵکردنی ڕیتمی یارییەکاندا ناسراوە.

ژمارە 32 دەپۆشێت

بوعەدی لە لێدوانێکدا خۆشحاڵیی خۆی دەربڕی و گوتی: «بەلامەوە مانچێستەر سیتی باشترین یانەی جیهانە، یانەکە ئاستێکی بەرز پێشکەش دەکات و دەزانێت چۆن سەرکەوتن مسۆگەر دەکات، هێشتا تەمەنم 18 ساڵە و گەیشتوومەتە یانە و پێگەیەکی نموونەیی بۆ گەشەکردنی بەهرەی یاریکردنم.»

 مانچێستەر سیتی ئاشکرای کردووە کە بوعەدی درێسی ژمارە 32 دەپۆشێت (هەمان ژمارەی پێشووی لە لیل)، دەشبێتە چوارەمین گرێبەستی هاوینەی 'سیتیزنس' دوای ئێلیۆت ئەندێرسۆن، جێرمی مونگا و جێرۆنیمۆ ڕولی.