د. پشدەر عەبدوڵڵا، پزیشكی پسپۆڕی نەخۆشییەکانی منداڵان، سەبارەت بە نەخۆشیی گەنم دەڵێت:

• نەخۆشیی گەنم یەکێکە لەو نەخۆشییە درێژخایەنانەی کە کاریگەریی ڕاستەوخۆ دەکاتە سەر گەشە و تەندروستیی منداڵ
• نەخۆشیی گەنم نەک تەنیا بوونی کێشەیە لە پرۆسەی هەرسکردندا، بەڵکو تێکچوونێکی سیستمی بەرگریی جەستەیە کە پێویستی بە تێگەیشتنێکی ورد هەیە لەلایەن دایکان و باوکانەوە
• کاتێک منداڵی تووشبوو بە نەخۆشیی گەنم خواردنێک دەخوات کە (گلوتین)جۆرێکی پڕۆتینە کە لە گەنمدا هەیە، سیستەمی بەرگریی جەستەی منداڵەکە وەک تەنێکی بێگانە و زیانبەخش دەیبینێت، لە ئەنجامدا سیستمی بەرگریی جەستە هێرش دەکاتە سەر پێکهاتە پەلکەییەکان لە ڕیخۆڵەباریکەدا
• ئەم پەلکانە بەرپرسن لە هەڵمژینی ڤیتامین و پێکهاتە خۆراکییەکان، کاتێک بەهۆی هەوکردنەوە لەناو دەچن، منداڵەکە تووشی بەدخۆراکی دەبێت، تەنانەت ئەگەر بڕێکی زۆر خواردنیش بخوات

نیشانەکانی نەخۆشیی گەنم لە منداڵی تازەلەدایکبوودا

• سکچوونی درێژخایەن و ئاوسانی سک
• نەمانی ئارەزووی خواردن
• سستبوونی گەشە و زیادنەکردنی کێشی جەستەی منداڵەکە
• ماندوویەتیی و بێهێزیی بەردەوام

نیشانەکانی نەخۆشیی گەنم لە ئەو منداڵانەی لە تەمەنی چوونە قوتابخانەدان

• ئازاری سک و ڕشانەوەی زۆر
• قەبزی (هەندێکجار لەبری سکچوون ڕوودەدات)
• کورتیی باڵا بەبەراورد بە هاوڕێکانی
• بوونی پەڵەی سپی یان تێکچوونی مینای ددان

نیشانەکانی نەخۆشیی گەنم لە هەرزەکاراندا

• درەنگ دەرکەوتنی نیشانەکانی پێگەیشتن
• ئازاری جومگەکان و ئێسکەکان
• بوونی پەڵەی پێست کە زۆر بخورێت

زانیاریی زیاتر

بۆ دەستکەوتنی زانیاریی زیاتر دەتوانن سەردانی ئەم لینکەی خوارەوە بکەن

نەخۆشیی گەنم چییە؟