تسیتسیپاس: پێشتر ئاگادار بووم کیریۆس ماددەی هۆشبەری بەکاردەهێنا
پوختەی هەواڵ:
- ستیفانۆس تسیتسیپاس ڕایگەیاند کە پێشتر ئاگاداری بەکارهێنانی ماددەی هۆشبەر بووە لەلایەن نیک کیریۆس.
- تسیتسیپاس دوای سەرکەوتنی لە خولی یەکەمی پاڵەوانێتیی کراوەی ئەمریکا ئەم لێدوانانەی دا.
- کیریۆس بەهۆی تاقیکردنەوەی ئەرێنی بۆ ماددەی کۆکاین لە مانگی حوزەیرانی ڕابردوو، ڕووبەڕووی ڕاگرتن دەبێتەوە تاوەکو چوار ساڵی دیکە.
- پەیوەندیی نێوان هەردوو یاریزانەکە لەدوای پاڵەوانێتیی وێمبڵدۆنی ساڵی 2022 تێکچوو.
ستیفانۆس تسیتسیپاسی یاریزانی تێنسی سەرزەویی یۆنانی ڕایگەیاند، سەرسام نەبووە بە ڕاگرتنی نیک کیریۆسی ئوسترالی بەهۆی بەکارهێنانی ماددەی هۆشبەرەوە، و ئاماژەی بەوەش دا کە پێش ئاشکرابوونی فەرمیی ئەم بابەتە ئاگادار بووە و زانیویەتی کیریۆسی ڕکابەری سەرقاڵی چییە.
تسیتسیپاس دوای سەرکەوتنی بەسەر ئارسەر فیسی فەرەنسی لە پاڵەوانێتیی کراوەی ئەمریکا گوتی: «لە ڕاستیدا پێشبینیم دەکرد، بەڵام سەرسام بووم لەوەی کاتێکی زۆری خایاند تاوەکو ئاشکرابوو.»
کیریۆس لە مانگی حوزەیرانی ئەمساڵ لە ئیسپانیا پشکنینی بۆ کرا و ئەنجامی پشکنینەکانی ئەرێنی بوون و دەرکەوت ماددەی هۆشبەری کۆکاینی بەکارهێناوە، بەو هۆیەشەوە لەلایەن لیژنەکانی سزادانەوە ڕاگیرا و ڕووبەڕووی سزای دوورخستنەوە بۆ ماوەی 4 ساڵ دەبێتەوە.
کێشەی نێوانیان لەسەر چی بوو؟
تسیتسیپاس باسی لەوەش کردووە کە پێش بڵاوبوونەوە لە تۆڕە کۆمەڵایەتییەکان زانیاریی تەواوی لەسەر بابەتەکە هەبووە.
گرژی و بەریەککەوتنی نێوان ئەم دوو یاریزانە بۆ یارییە پڕ لە ئاڵۆزییەکەیان لە پاڵەوانێتیی وێمبڵدۆنی ساڵی 2022 دەگەڕێتەوە.
کیریۆس لەلایەن خۆیەوە دان بە هەڵەکەیدا ناوە و ڕایگەیاندووە کە تووشی پێکان و بێهیوایی بووە بۆیە ئەم کارەی کردووە، بەڵام هاوکات ئاماژە بەوە دەکات کە ئەوە ناکاتە بیانوو و لە کۆتاییدا هەڵەیەکی گەورەی کردووە.
52 خولەک پێش ئێستا