د. هەڵۆ مستەفا ئۆرمزیار، پزیشکی پسپۆڕی نەشتەرگەریی گورچیلە و میزەڕۆ، سەبارەت بە دروستبوونی بەردی گورچیلە، دەڵێت:

• لە هاویندا بەهۆی بەرزیی پلەی گەرما و ئارەقکردنەوەی زۆر، جەستە ڕێژەیەکی زۆر لە ئاو لەدەستدەدات، کاتێک ئاوی جەستە کەم دەبێتەوە، میزی کەسەکە چڕ دەبێتەوە و ڕەنگەکەی تۆختر دەبێت
• کاتێک ڕێژەی ئاو لە ناو میزدا کەم دەبێتەوە، پێکهاتە کانزاییەکانی وەکو (کالسیۆم، ئۆکسالات و ترشی یوریک) بە ئاسانی لە ناو گورچیلەدا کۆدەبنەوە و بە تێپەڕبوونی کات دەبنەهۆی دروستبوونی بەردی گورچیلە
• زیادبوونی ڤیتامین دی، بەرکەووتن بە تیشکی خۆری هاوین دەبێتەهۆی زیاتربوونی بەرهەمهێنانی ڤیتامین دی لە جەستەدا، ئەمەش هەڵمژینی کالسیۆم لە لایەن جەستەوە زیاد دەکات و ئەگەری ڕژانی بۆ ناو میز و دروستبوونی بەرد بەرز دەکاتەوە

نیشانە باوەکانی بوونی بەردی گورچیلە  

• بوونی ئازاری توند و لەناکاوی کەمەر یان لایەکانی پشت
• سووتانەوە و ئازار لە کاتی میزکردندا
• گۆڕانی ڕەنگی میز بۆ تۆختر یان سوورباو (بوونی خوێن)
• دڵتێکەڵهاتن و ڕشانەوە

چۆن خۆت لە دروستبوونی بەردی گورچیلە دەپارێزیت؟

• ئاو زۆر بخورێتەوە: لە هاویندا ڕۆژانە ئاوی زۆر بخورێتەوە تاوەکو ڕەنگی میز بە بەردەوامی ڕوون بێت
• کەمکردنەوەی خواردنی خوێ: خواردنی خوێ لە ژەمەکاندا کەم بکرێتەوە، چونکە دەبێتەهۆی دەردانی کالسیۆمی زیاتر بۆ ناو میز
• ئاوی لیمۆ بخورێتەوە: لیمۆ دەوڵەمەندە بە پێکهاتەی "سیترات" کە ڕێگری لە  دروستبوونی بەردی گورچیلە دەکات
• ئەگەر کەسەکە هەستی بە بوونی ئازاری  کەمەر یان سووتانەوە لە کاتی میزکردندا کرد، سەردانی پزیشکی پسپۆڕ بکرێت بۆ دڵنیابوونەوە، پێش ئەوەی بەردی گورچیلەکە گەورەتر ببێت و کەسەکە تووشی ئازاری توندتر بکات

زانیاریی زیاتر

بۆ دەستکەوتنی زانیاریی زیاتر دەتوانن سەردانی ئەم لینکەی خوارەوە بکەن

بۆچی بەردی گورچیلە لە منداڵاندا زیادیکردووە؟