پووختەی هەواڵەکە

• ئەمڕۆ هەڵبژاردنی گشتیی سوید بەڕێوەدەچێت و کێبڕکێی سەرەکی لەنێوان بلۆکی چەپ و هاوپەیمانیی پارتە ڕاستڕەوەکاندایە.

• نزیکەی 200 بەربژێری کورد لە پارتە جیاوازەکاندا بەشدارن و زۆرینەیان لەسەر پارتە چەپەکان خۆیان بەربژێر کردووە.

• پارتە چەپەکان هۆشداری دەدەن لە قوڵبوونەوەی قەیرانی نیشتەجێبوون و نادادپەروەریی باج لە سایەی دەسەڵاتی ڕاستڕەوەکاندا.

• بەپێی هۆشدارییەکان، بڕیارە نوێیەکانی کۆچبەری لە سوید گەیشتووەتە ئاستی دیپۆرتکردنەوەی کەسانی خاوەن ڕەگەزنامەش.

---

هەڵبژاردنی گشتیی ئەمڕۆی سوید داهاتووی سیاسیی وڵاتەکە لەنێوان دوو بەرەی تەواو جیاوازدا یەکلایی دەکاتەوە. بەپێی زانیارییەکان، دەسەڵاتی چوار ساڵی ڕابردووی هاوپەیمانیی ڕاستڕەوەکان بووەتە هۆی توندکردنەوەی یاساکانی کۆچبەری بە شێوەیەک کە تەنانەت خاوەن ڕەگەزنامە سویدییەکانیش ڕووبەڕووی ناردنەوە دەبنەوە. لە لایەکی دیکەوە، دابەشبوونی چینایەتی بە جۆرێک قووڵ بووەتەوە کە بەساڵاچووان لە دابینکردنی پێداویستیی سەرەتایی و دەرماندا تووشی کێشە بوون.

---

سەلیمە فەهد، کاندیدی پارتی چەپ لە هەڵبژاردنی پەرلەمانی سوید بە کەناڵ8ــی ڕاگەیاند:

•  ئەم هەڵبژاردنە لە تەواوی 42 ساڵی ژیانم لە سوید یەکلاکەرەوەترە، چونکە بڕیارەکانی حکومەتی ئێستا کێشەی نیشتەجێبوون، کۆچبەران و بێکارییان گەیاندووەتە لوتکە.

• پارتە ڕەگەزپەرستەکان پرسی پەنابەران وەک ئامرازێک بۆ جووڵاندنی سۆزی دەنگدەران بەکاردەهێنن، لە کاتێکدا قەبارەی ڕاستەقینەی کێشەکە هێندە گەورە نییە.

• بەهۆی بڕیارە نوێیەکانەوە، کۆچبەری کوردی خاوەن ڕەگەزنامەی سوید هەبووە ڕەوانەی ئێران کراوەتەوە، سەرەڕای ئەوەی دایک و باوکیشی هەڵگری ڕەگەزنامەی سویدین.

• سیستم و سیاسەتی دارایی دادپەروەرانە نییە؛ لە کۆی 500 ملیۆنەر لە وڵات تەنیا 20٪یان باج دەدەن، لە کاتێکدا داهاتی خانەنشینان و بەساڵاچووان بەشی کڕینی خۆراک و دەرمان ناکات.

• نزیکەی 200 کاندیدی کورد هەن؛ بەشێکی کەمیان چوونەتە ناو پارتە ڕاستڕەوەکان، بەڵام زۆرینەیان لە بەرەی پارتە چەپەکاندان کە داوای پاراستنی مافە دیموکراسی و کۆمەڵایەتییەکان دەکەن.

حکوومەتی هاوپەیمانی و پارتە ڕاستڕەوەکان:

لە بەرامبەردا، پارتە ڕاستڕەوەکان و هاوپەیمانە لیبڕاڵەکانیان لە چوار ساڵی ڕابردوودا جەختیان لەوە کردووەتەوە کە کەمکردنەوەی ژمارەی کۆچبەران و توندکردنەوەی سنوورەکان پێویستییەکی بنەڕەتییە بۆ پاراستنی ئاسایش و سەقامگیریی ئابووریی سوید. ئەم بەرەیە پێیوایە سنووردارکردنی هاتنی پەنابەران و پێداچوونەوە بە مافەکانی نیشتەجێبووندا ڕێگری لە گوشارە داراییەکان و بارگرانیی سەر خزمەتگوزارییە گشتییەکان دەکات.

زانیاری لەسەر بابەتەکە:

لە سیستمی سیاسی و پەرلەمانیی سویددا هیچ پارتێک ناتوانێت بە تەنیا زۆرینە بەدەستبهێنێت و کابینەی حکومەت پێکبهێنێت، بەڵکو پێویستە لە ڕێگەی هاوپەیمانێتی لەگەڵ پارتەکانی دیکەدا لانی کەم 175 کورسی لە کۆی 349 کورسییەکەی پەرلەمان مسۆگەر بکات. هەڵبژاردنی ئەمڕۆش ململانێیەکی توندە لەنێوان دوو بەرەی سەرەکی، کە یەکەمیان پێکهاتووە لە سۆسیال دیموکراتەکان و پارتی چەپ و ژینگە، دووەمیشیان پێکهاتووە لە پارتە پارێزگار و ڕاستڕەوە نەریتییەکان بە پاڵپشتیی ڕاستڕەوە پۆپۆلیستەکان.