دەنگی چەند تەقینەوەیەک لە دەوروبەری سلێمانی و هەڵەبجە بیسترا
پووختەی هەواڵەکە:
- بەرەبەیانی ئەمڕۆ دەنگی چەند تەقینەوەیەکی بەهێز لە دەوروبەری سلێمانی و هەڵەبجە بیسترا.
- لە گوندێکی قەرەداغ تەقینەوەکە بووەتە هۆی دروستبوونی چاڵێکی گەورە و کەوتنەوەی ئاگر.
- هاوڵاتییان لە هەڵەبجە، دەربەندیخان و شارەزوور دیمەنی ڕووداوەکانیان بۆ کەناڵ8 ناردووە.
- دەزگا ئەمنییەکان دەستیان بە لێکۆڵینەوە کردووە بۆ زانینی هۆکاری دروستبوونی تەقینەوەکان.
زانیارییەک گەیشتووەتە کەناڵ8 کە تێیدا دەرکەوتنی ئاگر و دروستبوونی چاڵێکی گەورە لە قەرەداغ پێشاندەدات، دوای ئەوەی بەرەبەیانی ئەمڕۆ 14ـی ئەیلوول دەنگی زنجیرەیەک تەقینەوە لە سنووری پارێزگاکانی سلێمانی و هەڵەبجە بیستراوە. هاونیشتمانییان لە چەندین ناوچەی جیاوازەوە ئاماژە بە بیستنی دەنگی بەهێز دەکەن، لە کاتێکدا لایەنە ئەمنییەکان لێکۆڵینەوەی مەیدانییان بۆ دۆزینەوەی سەرچاوەی تەقینەوەکان دەستپێکردووە.
تەقینەوەکەی قەرەداغ و شایەتحاڵەکان (گوندی داری زیایین)
- دانیشتووانی گوندی داری زیایین لە شارۆچکەی قەرەداغ ئاماژە بەوە دەکەن کە دەنگی تەقینەوەیەکی زۆر بەهێز لە ناوچەکەیان بیستراوە.
- بەهۆی تەقینەوەکەوە ئاگر لە پوش و پاوانی ناوچەکە کەوتووەتەوە و دوای کوژاندنەوەی، شوێنەواری چاڵێکی گەورە لە زەوییەکەدا دۆزراوەتەوە.
- دەزگا ئەمنییەکان دەستبەجێ گەیشتوونەتە شوێنی ڕووداوەکە و لێکۆڵینەوەیان دەستپێکردووە بۆ زانینی هۆکار و سەرچاوەی تەقینەوەکە.
دەنگدانەوەی تەقینەوەکان لە هەڵەبجە، دەربەندیخان و شارەزوور
هاوکات بەپێی ئەو دیمەن و زانیارییانەی هاونیشتمانییان بۆ کەناڵ8ـیان ناردووە، لە هەڵەبجە، دەربەندیخان، شارەزوور و زەڕایەنیش دەنگی بەهێزی تەقینەوە لە بەرەبەیاندا بیستراوە و دواتر لە بەشێک لەو ناوچانە ئاگر لە پووش و پاوان کەوتووەتەوە؛ دانیشتووانی ناوچەکە دەڵێن دەنگەکان لەناکاو و بەهێز بوون، لە کاتێکدا هێزە ئەمنییەکان لەو سنوورانەش بەدواداچوونەکانیان چڕکردووەتەوە بۆ دەستنیشانکردنی شوێنی دروستبوونی ئەو دەنگانە.
زانیاری زیاتر بۆ تۆ
3 کاتژمێر پێش ئێستا