داخستنی بازاڕی ئازادی بەرهەمی جووتیارانی چۆمان ناڕەزایەتی لێکەوتەوە

پووختەی هەواڵەکە:

جووتیارانی چۆمان لە دژی داخستنی بازاڕە کاتییەکەی ساغکردنەوەی بەرهەمەکانیان گردبوونەوە و ناڕەزایەتییان دەربڕی.

جووتیاران هۆکاری داخستنی بازاڕەکەیان بۆ فشاری عەلوەی سۆران و دروستبوونی قۆرخکاری دەگەڕێننەوە.

بەڕێوەبەرایەتیی کشتوکاڵی سۆران رایدەگەیەنێت بازاڕەکە بەهۆی نەبوونی مۆڵەتی شارەوانییەوە داخراوە.

کشتوکاڵی سۆران دووپاتیدەکاتەوە دەستوەردان لە کڕین و فرۆشتن ناکەن و رۆڵیان تەنیا چاودێریی نرخ و بڕی بەرهەمەکانە.

زانیارییەک کە بە کەناڵ8 گەیشتووە، ئاماژە بەوە دەکات کە داخستنی بازاڕێکی ئازادی ساغکردنەوەی بەرهەمی کشتوکاڵی لە قەزای چۆمان، ناڕەزایەتیی لە نێوان جووتیاران و ئیدارەی ناوچەکە دروستکردووە. بەپێی بەدواداچوونەکان، جووتیاران داوای بەردەوامیی کارکردنی بازاڕە کاتییەکەیان دەکەن بۆ ئەوەی لە خەرجیی زیادەی گواستنەوە رزگاریان بێت، لە بەرامبەردا لایەنی فەرمی رێکارەکە بە جێبەجێکردنی یاسا و نەبوونی مۆڵەت دەبەستێتەوە.

ناڕەزایەتی و داواکارییەکانی جووتیارانی چۆمان

جووتیارانی ناوچەکە بازاڕێکی ئازادیان وەک عەلوەیەکی کاتی کردبووەوە تاوەکو بەرهەمەکانیان، بەتایبەت تەماتە، راستەوخۆ لە سنوورەکەیاندا ساغ بکەنەوە.

جووتیاران پێیان وایە بەهۆی ناڕەزایەتیی چەند کەسێک لە سۆرانەوە بە بیانووی زیانگەیاندن بە عەلوەی ئەو شارە، بازاڕەکەیان پێ داخراوە.

ئاماژە بەوە دەکەن کە لە عەلوەی سۆران کڕینی بەرهەمەکان تا کاتی ئێوارە دوادەخرێت بۆ ئەوەی بەرهەمەکە بەرەو تێکچوون بڕوات و بە نرخێکی هەرزان لێیان بکڕدرێتەوە.

دووپاتیدەکەنەوە کە بردنی بەرهەمەکانیان بۆ عەلوەی هەولێر و سۆران بەهۆی تێچووی سندوقی پلاستیک، کرێکار و هاتوچۆوە تووشی زیانی داراییان دەکات.

وەڵامی بەڕێوەبەرایەتیی گشتیی کشتوکاڵی سۆران

کامەران حوسێن، بەڕێوەبەری گشتیی کشتوکاڵی سۆران بە کەناڵ8ـی راگەیاند داخستنی ئەو بازاڕە تەنیا بۆ ڕێکخستنەوە و بەهۆی نەبوونی مۆڵەتی یاسایی بووە لە شارەوانییەوە. ناوبراو جەختی لەوە کردەوە جووتیاران سەرپشکن لەوەی چۆن و لە کوێ بەرهەمەکانیان بە قازانج دەفرۆشن، هەروەها روونیکردەوە کە رۆڵی بەڕێوەبەرایەتیی کشتوکاڵ لە بەڕێوەبردنی عەلوەکاندا تەنیا چاودێریکردنی ئاستی نرخەکان و تۆمارکردنی بڕی ئەو بەرهەمەیە کە دێتە ناو عەلوەکە و لەوێوە هەناردەی ناوچەکانی دیکە دەکرێت.

زانیاریی زیاتر بۆ تۆ

جوتیارانی سۆران: بارانی ئەمساڵ وەرزی داچاندنی دواخست، بەڵام چاوەڕێی بەرهەمی باش دەکەین

هەرێم و بەغداد لەسەر 11 خاڵی کشتوکاڵی گفتوگۆ دەکەن

ئەنجوومەنی وەزیرانی عێراق بڕیاری لەسەر بەرهەمی کشتوکاڵی و دەرمان و نیشتەجێبوون دەرکرد

وەزارەتی کشتوکاڵ: یەک دینارمان نییە بۆ پێدانی پێشینە بە جووتیاران

19 هەزار سەرە دەبە و 500 دار؛ چیرۆکی مامۆستایەک کە ژیانی بۆ ژینگەی سۆران تەرخان کردووە