پوختەی هەواڵ:

• یەکێتیی تۆپی پێی ئەورووپا (UEFA) یاریگەی «کامپ نو»ی بەرشلۆنەی بۆ میوانداریکردنی یاریی کۆتایی خولی یانە پاڵەوانەکانی ئەورووپای 2029 دەستنیشان کرد.
• یاریگەی ئەلیانز ئارێنای تایبەت بە بایرن میونشن لە ساڵی 2028 میوانداریی یاریی کۆتایی چامپیۆنزلیگ دەکات، ئەم وەرزەش لە یاریگەی میترۆپۆلیتانۆ لە مەدرید یارییەکە دەکرێت.
• کارەکانی نۆژەنکردنەوە لە کامپ نو بەردەوامن بۆ ئەوەی شوێنی 10 هەزار و 500 هاندەری تێدا بکرێتەوە، یاریی کۆتایی چامپیۆنزلیگی 1999ش هەر لەم یاریگەیەدا کراوە.
• یوێفا شارەکانی لیۆن و کاردیفی بۆ یارییە کۆتاییەکانی چامپیۆنزلیگی خانمان لە 2028 و 2029 دیاری کرد، میوانداریکردنی جامە ئەورووپییەکانی دیکەشی بە شارەکانی بوخارست، بەلگراد، تۆرینۆ و بوداپێست بەخشی.

یەکێتیی تۆپی پێی ئەورووپا (UEFA) ڕایگەیاند کە یاریگەی «کامپ نو»ی یانەی بەرشلۆنە میوانداریی یاریی کۆتایی خولی یانە پاڵەوانەکانی ئەورووپا لە ساڵی 2029 دەکات.

ئەم بڕیارە دەرفەتێکی گەورە بە بەرشلۆنە دەدات ساڵێک پێش ڕێکخستنی مۆندیالی 2030 لەلایەن ئیسپانیا، پۆرتوگال و مەغریبەوە، ئەزموونی کۆکردنەوەی نەتەوە جیاوازەکان بکات.

هاوکات کۆمیتەی جێبەجێکاری یوێفا پشتڕاستی کردەوە کە یاریی کۆتایی 2028 لە یاریگەی ئەلیانز ئارێنای تایبەت بە بایرن میونشن بەڕێوە دەچێت، لە کاتێکدا یاریی کۆتایی ئەم وەرزە لە یاریگەی میترۆپۆلیتانۆ لە مەدرید ساز دەکرێت.

لە ئێستادا کارەکانی نۆژەنکردنەوە لە کامپ نو بەردەوامن و لەدوای تەواوبوونی کارەکان، یاریگەکە جێگەی 10 هەزار و 500 هاندەری تێدا دەبێتەوە، دواجاریش ئەم شارە لە ساڵی 1999 میوانداریی کۆتایی خولەکەی کرد کاتێک مانچێستەر یونایتد بە ئەنجامی دوو گۆڵ بەرامبەر بە گۆڵێک لە بایرن میونشنی بردەوە. لە لایەکی دیکەوە، شاری لیۆن میوانداریی یاریی کۆتایی چامپیۆنزلیگی خانمان بۆ ساڵی 2028 دەکات و کاردیف لە ساڵی 2029 میوانداریی دەکات، هەروەها یاریی کۆتایی خولی ئەورووپا بۆ ساڵانی 2028 و 2029 بەخشرا بە بوخارست و بەلگراد، و یاریگەی یوڤێنتوس لە تۆرینۆ و پۆشکاش ئارێنا لە بوداپێست میوانداریی یارییە کۆتاییەکانی کۆنفرانس لیگ دەکەن.