بەشێک لە وڵاتە پێشکەوتووەکانی جیهان، بەمەبەستی دروستکردنی پاشخانێکی دەوڵەمەند بۆ خوێندکار، هەر لە قۆناغە سەرەتاییەکانی خوێندنەوە، ژمارەیەک وانەی تایبەت لە پڕۆگرامی خوێندندا جێگیر دەکەن کە پاڵنەر بێت بۆ گەشەپێدانی هزر و بیکردنەوەی منداڵ، دیارترینی ئەو وانانە:

• شەتڕەنج: یارمەتیدەر دەبێت بۆ بیرکردنەوە لە داهاتوو، هەژمارکردنی دەرئەنجامی بڕیارەکان و دووجار بیرکردنەوە پێش هەنگاونان

---

• هەڵهێنانی مەتەڵ: ئەم جۆرە وانەیە، خۆی لە چارەسەرکردنی پەزڵ و هەڵهێنانی مەتەڵ و کردنەوەی گرێ-کوێرە دەبینێتەوە، ئامڕازەکانی بەرجەستەن و لە کەشێکی ئارامدا ئەنجامدەدرێن، لەوانە: چارەسەر و ڕێکخستنەوەی پەزڵ

---

• وانەکانی ژیان: شێوازێکی کردەیی هەیە، خوێندکارەکان ڕۆڵی جیاواز دەگێڕن کە لە ژیانی ڕۆژانەدا مرۆڤەکان هەیانە، هەمووان لەم وانەیەدا دەبن بە خاوەنی بەرپرسیارێتیی خۆیان و بژاردە و بڕیارەکانیان کاریگەریی لەسەر خۆیان و بەرامبەر دروستدەکات، لە نموونەی یاریی کردەیی ڕۆڵگێڕان (Roleplay)

---

• وانەی دڵخۆشی: لە وڵاتێکی وەکو ئەڵمانیا، گرنگیی بەم وانەیە دەدرێت، کار دەکرێت بۆ دروستکردنی ئارامیی لە ناخی خوێندکاردا، کەشێک بۆ تێڕامان و گوێگرتن لە هەستەکانی بەرامبەر دەڕەخسێنرێت

---

• جەنگی ئەلیکترۆنی: لە وڵاتێکی وەکو ئیسرائیل گرنگی بەم وانەیە دەدرێت، ئامانج لێی هۆشیارکردنەوەی منداڵە لەبارەی داهاتووی تەکنەلۆجیا و ئەو مەترسییانەی بەهۆیەوە دروستدەبن

---

• خۆشنووسی: وڵاتانی چین و ژاپۆن، گرنگییەکی زۆر بەم وانەیە دەدەن، هاندەرێکی گەورەیە بۆ تێڕامان، ئارامبوونەوە، خۆڕاگری و پابەندبوون بە ڕێساکانی زمان

---

• ژیریی دەستکرد: بەگوێرەی قۆناغە جیاوازەکان، وانەکانی ژیریی دەستکرد لە پڕۆگرامی خوێندنی زۆرێک لە وڵاتانی جیهان نوێیە، کە ئامانج لێی فێرکردنی بەکارهێنان، تێگەیشتن لە پڕۆسێسی ژیرییەکە و بەدەستهێنانی ئەنجامی دروستە لەڕێگەی پێدانی فەرمانی گونجاو