ڕێوڕەسمی ڕاگەیاندنی یەکخستنەوەی هێزەکانی پێشمەرگە دەستیپێکرد

پووختەی هەواڵەکە

ڕێوڕەسمی فەرمیی یەکخستنەوەی هێزەکانی پێشمەرگە بە ئامادەبوونی سەرکردە باڵاکانی هەرێمی کوردستان، نوێنەری هاوپەیمانان و سوپای عێراق بەڕێوەچوو.

سەرجەم هێزەکانی پێشمەرگە لە چوارچێوەی دوو دەڤەر و 11 فیرقەی سەربازیدا ڕێکخرانەوە و لەمەودوا خاوەنی یەک بڕیار و یەک فەرماندەیی دەبن.

سەرۆکی هەرێم و سەرۆکوەزیران جەختیان لە بەنیشتمانیکردنی تەواوەتی پێشمەرگە و دوورخستنەوەی لە ململانێی حیزبی و بەهێزکردنی هەماهەنگی لەگەڵ سوپای عێراق کردەوە.

دڵشاد شەهاب، گوتەبێژی سەرۆکایەتیی هەرێمی کوردستان لە ڕێوەڕەسمی یەکخستنەوەی پێشمەرگەدتا بە کەناڵ8ـی گوت، لەمەودوا یەک پێشمەرگە لە دەرەوەی وەزارەت نامێنێت و پرۆسەی یەکگرتنەوەی تەواوەتی هێزەکانی پێشمەرگە بە سەرکەوتوویی کۆتاییهات، هاوکات هاوکاری و پشتیوانییەکانی هاوپەیمانانیش بۆ سوپای یەکگرتوو بەردەوام دەبن.

ڕێکخستنەوەی هێزەکان لە چوارچێوەی فیرقە سەربازییەکاندا

هەردوو دەڤەری 1 و 2ـی هێزەکانی پێشمەرگە بەفەرمی دەستبەکار بوون و تەواوی هێزەکان لە چوارچێوەی 11 فیرقەی سەربازیدا ڕێکخران.

لە ڕێوڕەسمەکەدا سەرۆکی هەرێمی کوردستان، سەرۆکوەزیران، جێگری سەرۆکوەزیران، وەزیری پێشمەرگە، نوێنەری هاوپەیمانان و بەڕێوەبەری نووسینگەی گشتیی هێزە چەکدارەکانی عێراق ئامادە بوون.

شۆڕش ئیسماعیل، وەزیری پێشمەرگە ڕایگەیاند پرۆسەکە سەرکەوتووانە تەواو بوو سەرەڕای ڕووبەڕووبوونەوەی ئاستەنگی زۆر، لەمەودواش هێزی پێشمەرگە یەک فەرماندەیی سەربازی و یەک بڕیاری دەبێت.

وەزیری پێشمەرگە ئاشکرایکرد مەسعود بارزانی و بافڵ تاڵەبانی پشتیوانیی سەرەکی و گەورەی سەرکەوتنی پرۆسەی یەکخستنەوەی پێشمەرگە بوون و داواشی لە هاوپەیمانان کرد لە هاوکارییەکانیان بەردەوام بن.

پەیامی بەرپرسانی باڵا بۆ بەنیشتمانیکردنی پێشمەرگە

لە بەشێکی دیکەی ڕێوڕەسمەکەدا، نێچیرڤان بارزانی، سەرۆکی هەرێمی کوردستان یەکخستنەوەی هێزەکانی بە هەنگاوێکی نیشتمانیی گەورە و سەرەتای قۆناغێکی سەختتر لەقەڵەمدا و دووپاتیکردەوە کە پێشمەرگە هێزی کوردستانە نەک حیزب و دەبێت ئەم هەنگاوە لە هەموو جومگەکانی وەزارەتدا ڕەنگبداتەوە. هاوکات مەسرور بارزانی، سەرۆکوەزیرانی کاربەڕێکەر ڕایگەیاند قۆناغی بەهێزکردن و پێشخستنی هێزەکان دەستپێدەکات و پێویستە لایەنگریی نیشتمانی ببێتە پێوەر و پێشمەرگە بۆ ململانێی ناوخۆیی و حیزبی بەکارنەهێنرێت، هاوکات جەختی لە گرنگیی هەماهەنگی لەگەڵ سوپای عێراق و هاوتاکردنی مووچەی پێشمەرگە لەگەڵ هاوتا عێراقییەکانیان کردەوە.

زانیاریی زیاتر لەسەر بابەتەکە

پرۆسەی یەکخستنەوەی هێزەکانی پێشمەرگە وەک وەرچەرخانێکی مێژوویی لە پێکهاتەی سەربازیی هەرێمی کوردستان دادەنرێت، کە ئامانج لێی کۆتاییهێنانە بە هەژموونی حیزبی و یەکخستنی تەواوی یەکە چەکدارەکان لەژێر چەتری وەزارەتی پێشمەرگەدا. ئەم هەنگاوە لە ڕێگەی دابەشکردنی هێزەکان بۆ سەر 11 فیرقە و دوو دەڤەری فەرمی پەیڕەو دەکرێت، بە جۆرێک کە فەرماندەیییەکی هاوبەش و یەکگرتوو بڕیار لەسەر جموجۆڵە سەربازییەکان بدات، هەروەها هەماهەنگیی سەربازی لەگەڵ بەغداد بەهێزتر بکات و پشتیوانییە دارایی و لۆجستییەکانی هاوپەیمانانیش بۆ سوپای کوردستان مسۆگەر بهێڵێتەوە.