بەهۆى خواردنى شاورمەوە لە هەولێر 150 کەس ژەهراوی بوون
پووختەی هەواڵەکە:
- قایمقامییەتى هەولێر: ئەو دوو کەسەى شاورمەکەیان فرۆشتووە دەستگیرکران
- پۆلیسی هەولێر: دوو تۆمەتبارەکە هیچ مۆڵەتێکی تەندروستی و شارەوانییان نەبووە
- چارەسەرى ئەو کەسانە کراوە کە سەردانى نەخۆشخانەیان کردووە.
لە گەڕەکى فەرمانبەرانى هەولێر بەهۆى فرۆشتنى شاورمەى ناتەندروست بە هاونیشتمانییان 150 کەس لە خوێندکارانى خوێندنگەیەک و هاونیشتمانییانى سنوورەکە ژەهراویی بوون، بەڕێوەبەرایەتى تەندروستیی هەولێریش دەڵێت، چارەسەرى ئەو کەسانە کراوە کە سەردانى نەخۆشخانەیان کردووە و قایمقامییەتى هەولێریش دەڵێت" فرۆشیارانى شاورمەکە دوو کەس بوون و دەستگیرکراون".
لێدوانی بەڕێوەبەرایەتی گشتیی تەندروستیی و قایمقامی هەولێر
- ئەو کەسانەی کە ژەهراوی بوون لە بەشى فریاکەوتنی نەخۆشخانەی ڕزگاری داخڵکراون و چارەسەرى پێویستیان بۆکراوە.
- باری تەندروستییان جێگیرە و بەدوداچوون کراوە بۆئەوەى بزانرێت کەسانى دیکە ژەهراوی نەبوون.
- دوو کەس کە فرۆشیارى شاورمەکە بوون دەستگیرکراون و دەستکراوە بە لێکۆڵینەوە لە هۆکارى ژەهراویبوونى ئەو کەسانەى شاورمەکەیان خواردووە.
- لە ئەنجامی بەدواداچوونەکان، دەرکەوت کە دوو تۆمەتبارەکە هیچ مۆڵەتێکی تەندروستی و شارەوانییان نەبووە و سەرلەبەری کارکردنیان قەدەغە بووە.
بەڕێوەبەرایەتى گشتیى تەندروستیى هەولێر لەبارەى ڕووداوەکە ڕایگەیاند، ئەو کەسانەی کە ژەهراوی بوون لە بەشى فریاکەوتنی نەخۆشخانەی ڕزگاری داخڵکراون و چارەسەرى پێویستیان بۆکراوە، باری تەندروستییان جێگیرە و بەدوداچوون کراوە بۆئەوەى بزانرێت کەسانى دیکە ژەهراوی نەبوون.
دوو کەس دەستگیراون کە فرۆشیاری شاورمەکە بوون
نەبەز عەبدولحەمید، قایمقامى هەولێریش بە کەناڵ8ـى ڕاگەیاند، دوو کەس کە فرۆشیارى شاورمەکە بوون دەستگیرکراون و دەستکراوە بە لێکۆڵینەوە لە هۆکارى ژەهراویبوونى ئەو کەسانەى شاورمەکەیان خواردووە.
ڕوونکردنەوەی پۆلیسی هەولێر
پۆلیسی هەولێر لە ڕوونکردنەوەیەکدا دەڵێت، لە ئەنجامی بەدواداچوونەکان، دەرکەوت کە دوو تۆمەتبارەکە هیچ مۆڵەتێکی تەندروستی و شارەوانییان نەبووە و سەرلەبەری کارکردنیان قەدەغە بووە.
دەشڵێت، بە بڕیاری دادوەری لێکۆڵینەوەی هەولێر، تۆمەتباران ڕاگيراون و لێکۆڵینەوە لە ڕووداوەکە بەردەوامە.
پەیامنێرى کەناڵ8 چووەتە ئەو شوێنەى کە شاورمەکەى تێدا فرۆشراوە، هاونیشتمانییەک دەڵێت، لە پاش خواردنى شاورمەکە ڕاستەوخۆ تەندروستی تێکچووە.
2 کاتژمێر پێش ئێستا