کارەباى ئیدارەى گەرمیان نەکراوەتە 24 کاتژمێرى

پووختەی هەواڵەکە

ئیدارەی گەرمیان تاوەکو ئێستا کارەبای 24 کاتژمێریی بۆ دابین نەکراوە و نرخی هەر کیلۆواتێک بە 18 دینار مایەوە.

حکومەت و تیمی پڕۆژەی ڕووناکی هۆکاری دواکەوتنی پڕۆژەکەیان لە گەرمیان بۆ چەند کۆسپێکی تەکنیکی و جێبەجێکردن گەڕاندووەتەوە.

بڕیارە تاوەکو کۆتایی ئەمساڵ کارەبای هەموو شاروشارۆچکەکان لەنێویاندا گەرمیان بێتە 24 کاتژمێری و هاوكات کارکردن بۆ بەستنی پێوەری زیرەک بەردەوامە.

بەگوێرەی زانیارییەک کە بە کەناڵ8 گەیشتووە، حازم کەریم، بەڕێوەبەری گشتیی کارەبای ئیدارەی گەرمیان رایگەیاندووە تاوەکو ئێستا کارەبای ناوچەکەیان نەکراوەتە 24 کاتژمێری، بەڵام کارەکانی دیکەی وەک سیستمی ئەلیکترۆنی و وەرگرتنی پارە بە ئی-پسوڵە کەوتوونەتەکار.

هۆکارەکانی دواکەوتنی پڕۆژەی کارەبای 24 کاتژمێری لە گەرمیان

بڕیار بوو لە مانگی حوزەیرانی ڕابردوو کارەبای گەرمیان بکرێت بە 24 کاتژمێری و نرخەکەی بەراورد بە ئێستا بەرزبکرێتەوە.

ئاماژە بەوەکراوە پێدانی کارەبا لە گەرمیان بۆ هەر کیلۆواتێک 18 دینارە، بەڵام ئەگەر ببێتە 24 کاتژمێری وەک شارەکانی دیکە دەبێتە 72 دینار.

دواکەوتنی پڕۆژەکە بۆ کەمبوونەوەی کارەبای دانەغاز و ئەنجامدانی چاکسازی گەڕێنراوەتەوە.

تیمی پڕۆژەی ڕووناکی راگەیاندووە تاوەکو بە تەواوی پابەندی ئەو شوێنانە نەبن کە کارەبایان 24 کاتژمێرییە، دەست بە شوێنی نوێ ناکەن.

لە ئێستادا ڕۆژانە 17 بۆ 18 کاتژمێر کارەبا دەدرێتە هاوبەشان و بڕیارە مانگی داهاتوو بڕەکەی بۆ 20 کاتژمێر زیادبکرێت.

داشکاندنی قەرزی کارەبا و بەستنی پێوەری زیرەک

بڕیارەکانی داشکاندنی قەرزی کارەبا هاونیشتمانییانی گەرمیان دەیگرێتەوە، بەجۆرێک هاوبەشان پارەی کارەبای مانگی ئاب بە داشکاندنی 50% دەدەن؛ بە پێچەوانەی ئەو شارانەی کارەبایان 24 کاتژمێرییە کە داشکاندنەکە تەنیا بۆ قەرزی پێش پڕۆژەی ڕووناکییە. هاوکات کۆمپانیاکان بەردەوامن لە کارکردن بۆ بەستنی پێوەری زیرەک و بەستنەوەیان بە سێرڤەرەوە لەو شوێنانەی جێبەجێ نەکراون.

زانیاری زیاتر لەسەر بابەتەکە

بەگوێرەی ئەو بڕیارەی دراوە، بڕیارە تاوەکو کۆتایی ئەمساڵ هەموو شار و شارۆچکەکانی کوردستان ببنە خاوەنی کارەبای 24 کاتژمێری. هەروەها پڕۆژەی ڕووناکی نوێترین ئامارەکانی بڵاوکردووەتەوە کە تێیدا پێدانی کارەبای 24 کاتژمێری بۆ 5 ملیۆن و 500 هەزار هاوڵاتی و 153 هەزار موڵکی بازرگانی دابینکراوە، و زیاتر لە 1 ملیۆن شوێن تۆمارکراون و زۆرتر لە 5 هەزار و 900 مۆلیدەش کوژێنراونەتەوە.

زانیاریی زیاتر بۆ تۆ

ئەنجوومەنی وەزیران یەکخستنەوەی هێزەکانی پێشمەرگە و قەرزی کارەبا تاوتوێ دەکات

زانیاریى کەناڵ8: قەرزى کارەبا بە داشکاندنى 50% بۆ هاوبەشانى ماڵان و کشتوکاڵى دەستپێدەکاتەوە