عێراق 275 هەزار پارچە زەوی بەسەر هاووڵاتییاندا دابەشدەکات
پووختەی هەواڵەکە:
- لە قۆناغی یەکەمدا 275 هەزار پارچە زەوی لە پارێزگاکانی عێراق ئامادە کراوە.
- زەوییەکان ئەو هاووڵاتییانە دەگرێتەوە کە پێشتر لە وەرگرتنی موڵک سوودمەند نەبوون.
- پڕۆژەکە لە چوارچێوەی دەستپێشخەریی دابەشکردنی 1 ملیۆن پارچە زەوی پۆلێن دەکرێت.
- عێراق لە ئێستادا پێویستی بە 2 ملیۆن و 300 هەزار یەکەی نیشتەجێبوون هەیە.
حکومەتی عێراق ڕێکارەکانی گواستنەوەی خاوەندارێتی بۆ زیاتر لە 275 هەزار پارچە زەوی دەستپێکردووە وەک قۆناغی یەکەمی پڕۆژەیەکی نیشتمانی، بە ئامانجی کەمکردنەوەی قەیرانی نیشتەجێبوون و دابەشکردنی زەوی بەسەر ئەو هاووڵاتییانەی تاوەکو ئێستا هیچ موڵکێکیان بەناوەوە نەبووە.
ئیستەبرەق سەباح، گوتەبێژی وەزارەتی ئاوەدانکردنەوە و نیشتەجێکردنی عێراق ڕایگەیاند:
- لیژنە هونەرییەکان دەستیان بە ئامادەکاری کردووە بۆ گواستنەوەی خاوەندارێتیی زەوییەکان بۆ سەر شارەوانییەکان.
- وەک قۆناغی یەکەم، 275 هەزار پارچە زەوی لە بەغداد و پارێزگاکانی دیکە تەرخانکراوە بۆ دابەشکردن.
- پڕۆسەی دابەشکردنەکە تەنیا ئەو کەسانە دەگرێتەوە کە پێشتر لە وەرگرتنی زەوی سوودمەند نەبوون و خاوەنی خانووبەرە نین.
- گواستنەوەی خاوەندارێتیی زەوییەکان بەستراوەتەوە بە پەسەندکردنی نەخشەی بنەڕەتی بۆ دڵنیابوونەوە لە کەوتنیان لە سنووری شارەوانی.
هەماهەنگیی نێوان وەزارەتەکان و قەرەبووکردنەوەی زەوی:
لە بەشێکی دیکەی ڕێکارە کارگێڕییەکاندا، وەزارەتی ئاوەدانکردنەوە هەماهەنگی لەگەڵ وەزارەتەکانی بەرگری، کشتوکاڵ و فەرمانگەی تۆماری خانووبەرە دەکات بە مەبەستی چارەسەرکردنی گرفتە یاسایی و هونەرییەکان؛ بەگوێرەی بڕیارەکان ئەو زەوییانەی پۆلێنی کشتوکاڵین، لەلایەن وەزارەتی کشتوکاڵی عێراقەوە قەرەبوو دەکرێنەوە تا بخرێنە چوارچێوەی ماستەرپلانی شارەوانییەکان و بۆ مەبەستی نیشتەجێبوون بەکاربهێنرێن.
پێشینە و ئاماری قەیرانی نیشتەجێبوون:
ئەم ڕێکارانە لە چوارچێوەی دەستپێشخەرییەکەی عەلی زەیدی، سەرۆکوەزیرانی عێراقدایە بۆ دابەشکردنی 1 ملیۆن پارچە زەوی بەسەر هاووڵاتییاندا؛ بەپێی ئامارە فەرمییەکان، عێراق لە ئێستادا پێویستی بە 2 ملیۆن و 300 هەزار یەکەی نیشتەجێبوون هەیە بۆ پڕکردنەوەی کورتھێنانی خانوو، و پێشبینی دەکرێت گواستنەوە و دابەشکردنی ئەم زەوییانە بەشێکی بەرچاو لە خواست لەسەر کەرتی نیشتەجێبوون کەمبکاتەوە.
زانیاریی زیاتر بۆ تۆ:
حکومەتی عێراق سەکۆی دابەشکردنی یەک ملیۆن پارچە زەوی ڕادەگەیەنێت
41 خولەک پێش ئێستا