سروە عەبدولواحید: دەبێت هەرێمی کوردستان هەموو شایستە دارایی و دەستوورییەکانی وەربگرێت
پووختەی هەواڵەکە:
- وەزیری شەهیدانی هەرێمی کوردستان لەگەڵ وەزیری ژینگەی عێراق کۆبووەوە.
- شایستە داراییەکانی کەسوکاری شەهیدان و زیندانیانی سیاسی تاوتوێ کرا.
- وەزیری ژینگەی عێراق پشتیوانی بۆ دەستەبەرکردنی مافەکانی هەرێم دەربڕی.
- ڕەشنووسی بودجەی 2027 لە ئەنجوومەنی وەزیرانی عێراق تاوتوێ دەکرێت.
شاندێکی حکومەتی هەرێمی کوردستان لە بەغداد هەڵمەتێکی فراوانی بۆ بەدەستهێنانی پشتیوانیی وەزیرە کوردەکان دەستپێکردووە، بە ئامانجی چەسپاندنی ماف و شایستە داراییەکانی کەسوکاری شەهیدان و زیندانیانی سیاسی لە پڕۆژە بودجەی 2027ـی عێراقدا.
عەبدوڵا حاجی مەحمود، وەزیری کاروباری شەهیدان و ئەنفالکراوان ڕایگەیاند:
- پێویستە نوێنەرانی کورد لە حکومەتی فیدراڵ پشتیوانی لە داواکارییەکانی وەزارەتی شەهیدان بکەن.
- ماف و شایستە داراییەکانی زیندانیانی سیاسی و کەسوکاری ئەنفالکراوان لە دۆسیە لەپێشینەکانن.
- قۆناغی ئێستا بەهۆی ئامادەکردنی پڕۆژەیاسای بودجەی 2027 قۆناغێکی هەستیارە بۆ هەرێمی کوردستان.
- داوا دەکەین تەواوی شایستە دەستوورییەکان لەناو بودجەدا بچەسپێنرێن تا شایستەی ئەو توێژانە مسۆگەر بکرێت.
هەڵوێستی وەزیری ژینگەی عێراق و دۆسیەی بودجە:
لە لایەن خۆیەوە سروە عەبدولواحید، وەزیری ژینگەی عێراق لە کۆنفرانسێکی ڕۆژنامەوانیدا ڕایگەیاند کە پێویستە هەرێمی کوردستان سەرجەم شایستە دەستوورییەکانی خۆی بەدەستبهێنێت و داکۆکی لە چەسپاندنی مافە داراییەکان لە بودجەدا دەکەن؛ عەبدولواحید ڕوونیکردەوە کە ڕەشنووسی بودجەی 2027 گەیشتووەتە ئەنجوومەنی وەزیران بەڵام تاوەکو ئێستا نەدراوەتە وەزیرەکان بۆ خوێندنەوەی وردەکارییەکان، هاوکات هیوای خواست هەرێمی کوردستان پابەندی جێبەجێکردنی ئەو یاسایە بێت کە لە پەرلەمان پەسەند دەکرێت و پێداگری لەوە کرد کە دەبێت هاوشێوەی پێشوو پشکی هەرێم دیاریکراو بێت.
پێشینەی هەوڵەکان بۆ شایستەی زیندانیانی سیاسی:
ئەم کۆبوونەوەیە لە چوارچێوەی زنجیرەیەک دیداری شاندی وەزارەتی کاروباری شەهیدان و ئەنفالکراوانە لە بەغداد، کە پێشتریش دۆسیەی زیاتر لە 25 هەزار زیندانی سیاسییان گەیاندبووە دەستەی زیندانیانی سیاسیی عێراق تا هاوتاکردنی مینحەکانیان جێبەجێ بکرێت؛ لە کاتێکدا گفتوگۆکانی تایبەت بە پڕۆژەیاسای بودجەی گشتی بۆ ساڵی 2027 لە ناوەندەکانی بڕیاردان لە بەغداد پێدەنێتە قۆناغی کۆتاییەوە.
زانیاریی زیاتر بۆ تۆ:
دیلان غەفوور: ژمارەیەک داواکاریی هەرێمى کوردستان لە بودجەدا جێگیرکراون
بەغداد پشکی هەرێمی کوردستان لە پڕۆژە بودجەی 2027 کەمدەکاتەوە
56 خولەک پێش ئێستا